नेप्से परिसूचक ३१२३ विन्दुमा साढे १५ अर्ब रुपैयाँको शेयर कारोबार
काठमाडौं, २० साउन । बुधबार नेप्से परिसूचक हालसम्मकै उच्च विन्दुमा पुगेर बन्द भएको छ । लगातार उकालो लागेको परिसूचक आज १२.०३ अंकले वृद्धि भएर ३१२३.१५ विन्दुमा रोकिएको छ । आज परिसूचक ३१४० विन्दुमा पुगेर फर्किएको थियो ।
आज २२५ कम्पनीको २ करोड ८८ लाख १३ हजार कित्ता शेयर १५ अर्ब ५९ करोड ५७ लाख रुपैयाँमा खरिद विक्री भएको छ । आज ६ वटा हाइड्रोपावर कम्पनीको शेयर मूल्य सर्वाधिक वृद्धि भएको छ । यी ६ कम्पनीको शेयर मूल्य १० प्रतिशतले वृद्धि भएको हो । त्यस्तै युनियन लाइफ इन्स्योरेन्स कम्पनी लिमिटेडको पनि १० प्रतिशतले नै शेयर मूल्य वृद्धि भएको छ ।
ङ्यादी ग्रुप पावर लिमिटेडको भने शेयर मूल्य ५ प्रतिशतले घटेको छ ।
सर्वाधिक मूल्यको शेयर खरिद विक्री अपि पावर कम्पनी लिमिटेडको भएको छ । यो कम्पनीको ७९ करोड ५० लाख रुपैयाँको शेयर खरिद विक्री भएको छ ।
आज कारोबारमा आएका १३ समूहमध्ये ६ वटा समूहको परिसूचक वृद्धि भएको छ भने बाँकी समूहको परिसूचक घटेको छ । सर्वाधिक परिसूचक वृद्धि हाइड्रोपावर समूहको भएको छ । यो समूहको परिसूचक ५.८१ अंकले वृद्धि भएको छ ।
