तरलता सहज बनाउन २० अर्बको रिपो जारी गर्दै राष्ट्र बैंक
काठमाडौं, ३१ भदौ । पछिल्ला दिनमा बैंकिङ प्रणालीमा तरलता अभाव हुन थालेपछि यसलाई सहज बनाउन नेपाल राष्ट्र बैंकले २० अर्ब रुपैयाँ बराबरको रिपो जारी गर्ने भएको छ । केन्द्रीय बैंकले १४ दिने अवधिको उक्त रकमको रिपो आज (बिहीवार) बोलकबोलमार्फत जारी गर्न लागेको हो ।
उक्त रकमका लागि हुने आज दिउँसो ३ बजेसम्म हुने बोलकबोलमा वाणिज्य बैंक, विकास बैंक र वित्त कम्पनी सहभागी हुन पाउनेछन्, जुन आगामी असोज १४ गते परिपक्व हुनेछ । तरलता सहज बनाउन यसअघि भदौ २३ गते पनि राष्ट्र बैंकले रिपोमार्फत २३ अर्ब रुपैयाँ प्रवाह गरेको थियो ।
कर्जा प्रवाहको तुलनामा निक्षेप संकलनमा कमी आउँदा बैंक तथा वित्तीय संस्थालाई लगानीयोग्य रकमको अभाव देखिन थालेको छ । राष्ट्र बैंकको अनुसार हाल बैंक तथा वित्तीय संस्थाको सीडी रेशियो ८७.७१ प्रतिशत पुगिसकेको छ । चालू आवको मौद्रिक नीतिमार्फत सीसीडी रेशियोको व्यवस्था हटाएर सीडी रेशियो ९० प्रतिशतसम्म कायम गरिएको छ ।
