नाका अनियमित सञ्चालनले घट्यो तातोपानी भन्सारको राजस्व

सिन्धुपाल्चोक, ३ असोज । चीनसँगको प्रमुख व्यापारिक भन्सार नाका तातोपानीबाट यस आर्थिक वर्षको पहिलो महिना (साउन)मा लक्ष्यभन्दा कम राजस्व सङ्कलन भएको छ ।

भन्सार नाका अनियमित भएपछि राजस्व सङ्कलन लक्ष्यभन्दा कम भएको हो । अत्यधिक वर्षासँगै पहिराले सीमावर्ती क्षेत्र लिपिङ बजार जोड्ने लिपिङ मोटरबेल पुल र कोदारी राजमार्गको लार्चा–कोदारी बजार क्षेत्रको सडक भासिँदा असारबाट नाका ठप्पजस्तै बनेको छ ।

सडक अवरुद्ध भएपछि न्यालम, खासा हुँदै तातोपानी नाका भएर आएका सामान लिपिङबाट तुइन र बोकेर ल्याउनुपरेको छ । तातोपानी भन्सारबाट असार महिनादेखि दैनिक दुईवटा कन्टेनर मात्रै भित्रिने गरेको तातोपानी भन्सार कार्यालयका भन्सार अधिकृत नारद गौतमले बताएको राससमा उल्लेख छ । दशैँ, तिहार नजिकिँदै जाँदा पनि नाका पूर्णरूपमा सञ्चालन भएको छैन, जसकाकारण गत वर्षझै अभाव सिर्जना हुनसक्ने भन्दै व्यवसायीले चिन्ता व्यक्त गरेका छन् ।

भन्सार कार्यालयमा साउनमा ७ करोड २१ लाख राजस्व सङ्कलन भएको छ । कोरोना महामारीबीच नेपाली व्यापारीले चीनबाट सामान खरिद गरेका छन् । आर्थिक वर्ष २०७७÷७८ मा चीनबाट खासा हुँदै नेपाल आइपुगेका १० मुख्य सामग्रीको परिमाण र मूल्य हेर्दा विगतमा भन्दा निकै कम सामग्री आयात भएको पाइएको छ ।

प्रमुख भन्सार अधिकृत गौतमका अनुसार ५२ करोड ६७ लाखको तयारी कपडा ४२ लाख ९८ हजार ७२३ युनिट, १ अर्ब २२ करोड ८५ लाख मूल्यको स्याउ एक करोड ६५ लाख ७८ हजार ४१४ केजी, १९ करोड ४५ लाखको मेडिकल मास्क पाँच करोड ८५ लाख १६ हजार ३४० युनिट तातोपानी नाकाबाट नेपाल भित्रिएको छ ।

त्यसैगरी १३ करोड ४६ लाखको ओखर चार लाख ३९ हजार ७२ केजी, सात करोड २३ लाखको महिलाले लगाउने जुत्ता, चार करोड ६५ लाखको रबर र प्लास्टिकका जुत्ता, चार करोड पाँच लाखको डम्फर, ६ करोड ४२ लाखको ट्रेलर, ५ करोड ५८ लाखको सुती कपडा र पाँच करोड ४६ लाख मूल्यको चार लाख ५२ हजार ४५० केजी लसुन आयात भएको थियो । यस अलावा कोरोना महामारीको दोस्रो लहर सुरु हुनासाथ निजी क्षेत्र र अनुदानवापतको झण्डै ३० हजार थान अक्सिजन सिलिन्डर पनि तातोपानी नाकाबाट नेपाल भित्रिएको थियो । तर स्वास्थ्य सामग्रीका लागि भने राजस्व छुट थियो । २०७२ सालको भूकम्पअघि दैनिक रु डेढ करोडसम्म राजस्व असुली हुँदै आएको थियो ।

Leave a Reply

Your email address will not be published. Required fields are marked *