बैंक तथा वित्तीय संस्थाहरूमा रहेको निक्षेप घट्यो, निजीक्षेत्रमा प्रवाहित कर्जामा झीनो वृद्धि

काठमाडौं, ९ असोज । चालू आर्थिक वर्षको पहिलो महिना साउनमा बैंक तथा वित्तीय संस्थामा रहेको निक्षेप घटेको छ भने निजीक्षेत्रमा प्रवाहित कर्जामा झीनो वृद्धि भएको छ । नेपाल राष्ट्र बैंकले बिहीवार सार्वजनिक गरेको तथ्यांकले यस्तो देखाएको हो ।

केन्द्रीय बैंकका अनुसार सो अवधिमा बैंक तथा वित्तीय संस्थामा रहेको निक्षेपमा १.६ प्रतिशतको कमी आएको छ । अघिल्लो वर्षको सोही अवधिमा यस्तो निक्षेप ०.१ प्रतिशतले घटेको थियो । वार्षिक बिन्दुगत आधारमा भने गत आर्थिक वर्षमा बैंक तथा वित्तीय संस्थाहरूमा रहेको निक्षेप १९.६ प्रतिशतले बढेको थियो ।

२०७८ साउनमा बैंक तथा वित्तीय संस्थाहरूको कुल निक्षेपमा चल्ती, बचत र मुद्दतीको अंश क्रमशः ७.८ प्रतिशत, ३४.३ प्रतिशत र ४९.५ प्रतिशत रहेको छ । अघिल्लो वर्ष यस्तो अंश क्रमशः ७.७ प्रतिशत, ३२.२ प्रतिशत र ५०.६ प्रतिशत रहेको थियो ।

यसैगरी समीक्षा अवधिमा बैंक तथा वित्तीय संस्थाहरुबाट निजी क्षेत्रमा प्रवाहित कर्जा १.२ प्रतिशतले बढेको छ । अघिल्लो वर्षको सोही अवधिमा यस्तो कर्जा ०.५ प्रतिशतले घटेको थियो । वार्षिक बिन्दुगत आधारमा २०७८ साउन मसान्तमा बैंक तथा वित्तीय संस्थाहरुबाट निजी क्षेत्रतर्पm प्रवाहित कर्जा २९.४ प्रतिशतले बढेको छ ।

सो अवधिमा निजी क्षेत्रतर्पm प्रवाहित कर्जामध्ये वाणिज्य बैंकहरुको कर्जा प्रवाह १.१ प्रतिशतले, विकास बैंकहरुको कर्जा प्रवाह २ प्रतिशतले र वित्त कम्पनीहरुको कर्जा प्रवाह १.६ प्रतिशतले बढेको छ । साउन मसान्तमा बैंक तथा वित्तीय संस्थाहरुको लगानीमा रहिरहेको कर्जामध्ये ६६.२ प्रतिशत कर्जा घर जग्गाको धितोमा र १२.८ प्रतिशत कर्जा चालु सम्पत्ति (कृषि तथा गैर–कृषिजन्य वस्तु) को धितोमा प्रवाह भएको छ । २०७७ साउन मसान्तमा यस्तो धितोमा प्रवाहित कर्जाको अनुपात क्रमशः ६६.१ प्रतिशत र १२.७ प्रतिशत रहेको थियो ।

Leave a Reply

Your email address will not be published. Required fields are marked *