बैंकिङ प्रणालीमा चर्किंदै तरलता अभाव, आज पुनः ३० अर्बको रिपो जारी गरिँदै

काठमाडौं, १३ असोज । बैंक तथा वित्तीय प्रणालीमा लगानीयोग्य रकम (तरलता)को अभाव चर्किंदै गएको छ । लगानीयोग्य रकम जुटाउन बैंकहरूले निक्षेपमा ब्याजदर बढाए पनि प्रभावकारी हुन सकेको छैन ।

बैंकिङ प्रणालीमा तरलता अभाव हुँदा यसको सन्तुलनका लागि नेपाल राष्ट्र बैंकले अल्पकालीन अवधिको रिपो जारी गर्दै आएको छ । सोही क्रममा आज बुधवार पुनः रू. ३० अर्ब बराबरको रिपो जारी गर्ने भएको छ । बैंकले सात दिन अवधिको उक्त परिमाणको रिपो जारी गर्न लागेको हो । यही असोज २० गते परिपक्व हुने सो रिपो वाणिज्य बैंक, विकास बैंक र वित्तीय संस्थाले बोलकबोलमार्फत खरिद गर्न सक्नेछन् ।

यसअघि केन्द्रीय बैंकले असोज ७ गते पनि ३० अर्बको सात दिन अवधिको, भदौ १७ गते २० अर्बको सात दिन अवधिको, २४ गते १४ दिनको ३० अर्ब र भदौ ३१ गते २० अर्ब रिपोमार्फत रकम उपलब्ध गराएको थियो ।
तरलता अभावमा बैंक तथा वित्तीय संस्थाले रिपो, अन्तरबैंक सापटी, स्थायी तरलता सुविधा (एसएलएफ) प्रयोग गर्छन् । तरलता अभावमा बैंक तथा वित्तीय संस्थाले अन्तरबैंक सापटी पाउन छाडेको देखिन्छ । बैंक तथा वित्तीय संस्थाले नियमित रूपमा एसएलएफ सुविधा लिने गरेका छन् ।

Leave a Reply

Your email address will not be published. Required fields are marked *