अग्रिम टिकटमा देखिएन आकर्षण, आठ दिनमा १७ हजार मात्रै बुकिङ

काठमाडौं, १९ असोज । यस वर्ष दशैं, तिहार लगायत चाडपर्वका लागि खुलाइएको अग्रिम टिकट बुकिङमा सर्वसाधारणको चाप घटेको छ । विगतका वर्षमा दशैं नजिकिँदै गर्दा अग्रिम टिकट बुकिङ गर्नेहरूको संख्या उल्लेख्य रहने गरेकोमा यस वर्ष खासै विक्री भएको देखिँदैन ।

काठमाडौँको गोङ्गबुस्थित नयाँ बसपार्कबाट असाज ११ देखि खुलाइएकोमा अग्रिम टिकट १७ हजार यात्रुले मात्रै बुकिङ गरेका छन् । गतवर्ष घटस्थापनाको अघिसम्म ६० देखि ७० हजार यात्रुले अग्रिम बस टिकट लिने गरे पनि यस वर्ष भने यात्रुको सङ्ख्यामा कमी आएको हो । यात्रुले घटस्थापनादेखि अष्टमीसम्मका लागि अग्रिम टिकट काटेका छन् ।

नयाँ बसपार्क सञ्चालन गरेको लोत्से बहुउद्देश्यीय प्रालिका महाप्रबन्धक सुनिल कुँवरले यस वर्ष अघिल्ला वर्षहरुको जस्तो अग्रिम बस टिकट लिने यात्रुको चाप नभएको बताए । ‘कोरोना महामारी र बाटोको दुरावस्थाका कारण अग्रिम टिकट लिने यात्रु सोचेजस्तो छैनन्,’ उनले भने । हाल नयाँ बसपार्कमा दैनिक एक हजारभन्दा बढी सार्वजनिक सवारी साधन आवतजावत गर्दै आएका छन् ।

काठमाडौँको नयाँ बसपार्कबाहेक चावहिल, गौशाला, माछापोखरी, कोटेश्वर र कलङ्कीमा पनि अग्रिम टिकट बुकिङ खुला गरिएको छ ।

Shangrila

Leave a Reply

Your email address will not be published. Required fields are marked *