यस वर्ष नेपालको आर्थिक वृद्धि ३.९ प्रतिशत रहने विश्व बैंकको प्रक्षेपण
असोज २१, काठमाडौं । चालू आर्थिक वर्षमा नेपालको आर्थिक वृद्धि ३.९ प्रतिशत रहने प्रक्षेपण विश्व बैंकले गरेको छ । बैंकले बिहीबार ‘साउथ एशिया इकोनोमी फोकस’ सार्वजनिक गर्दै यस्तो प्रक्षेपण गरेको हो ।
कोभिडविरुद्ध खोप लगाउने क्रम बढेको, आर्थिक व्यावसायिक गतिविधि चलायमान बन्दै गएको, पर्यटन क्षेत्र खुल्दै गएको र विप्रेषण आय समेत बढ्ने अनुमान गर्दै बैंकले उक्त प्रक्षेपण गरिएको प्रतिवेदनमा भनिएको छ ।
विश्व बैंकले गरेको मुलुकको आर्थिक वृद्धिको प्रक्षेपण चालू आवमा सरकारले लिएको लक्ष्यभन्दा ३.१ प्रतिशत कम हो । यस वर्षको आर्थिक वृद्धिको लक्ष्य ७ प्रतिशत रहेको छ । यस वर्ष गत आवको भन्दा १.८ प्रतिशतले बढी आर्थिक वृद्धि हुने बैंकले बताएको छ । सार्वजनिक प्रतिवेदनका अनुसार नेपालको आर्थिक वृद्धि आगामी आवमा ४ दशमलव ७ प्रतिशत रहने अनुमान गरिएको छ । बैंकले यस वर्ष समग्र दक्षिण एशियाको आर्थिक वृद्धिदर भने ७.१ प्रतिशत रहने प्रक्षेपण गरेको छ ।
