आज फागु पूर्णिमा, काठमाडौं उपत्यकाको सुरक्षामा कडाइ, बिहानैदेखि मापसे चेकिङ
काठमाडौं, ३ चैत । फागु पूर्णिमालाई ध्यानमा राखी हुनसक्ने अप्रिय घटना नियन्त्रण गर्न आज उपत्यकामा करिब ४ हजार प्रहरी परिचालित गरिँदै छ। महानगरीय प्रहरी कार्यालय रानीपोखरीका प्रवक्ता प्रहरी उपरीक्षक सन्तोषसिंह राठौरका अनुसार उपत्यकामा अप्रिय घटना हुन नदिन सुरक्षा व्यवस्था कडा पारिएको जानकारी दिए ।
कार्यालयका अनुसार काठमाडौंमा करिब २ हजार ५ सय, ललितपुरमा ७ सय र भक्तपुरमा ४ सय प्रहरी परिचालित हुनेछन् । त्योबाहेक आवश्यकताको आधारमा थप प्रहरी परिचालन गर्ने तयारी पनि भएको छ । होलीमा उपत्यकामा महानगरीय अपराध महाशाखाबाट सयभन्दा बढी सादा पोशाकमा खटाइने भएको छ।
त्यस्तै ४५ ठाउँमा मोबाइल भ्यान, ७३ कन्ट्रोल रूम भेहिकल (सीआरभी) र करिब ८० वटा मोटरसाइकल गस्ती गरिने बताइएको छ। यो सँगै मापसे चेकिङका लागि मुख्य सडकमा ट्राफिक परिचालित हुने उनले जानकारी दिए ।
