४६ लाख २४ हजार नाघे स्थायी लेखा नम्बर लिने करदाता
काठमाडौं, १९ वैशाख । चालू आर्थिक वर्षको ८ महिनामा स्थायी लेखा नम्बर लिने करदाता संख्या ४६ लाखभन्दा बढी पुगेको छ । आन्तरिक राजस्व विभागको तथ्यांकलाई आधार मान्दै अर्थ मन्त्रालयले सार्वजनिक गरेको प्रतिवेदनमा फागुन मसान्तसम्ममा स्थायी लेखा नम्बर लिने कुल करदाता संख्या ४६ लाख २४ हजार ४६१ पुगेको हो ।
सो अवधिमा व्यक्तिगत स्थायी लेखा नम्बर लिने करदाता २८ लाख ५६ हजार ५८९ रहेका छन्, जुन कुल करदाताको ६१.८ प्रतिशत हो । यस्तै व्यावसायिक स्थायी लेखा नम्बर लिने करदाता संख्या १७ लाख ५२ हजार ६७४ पुगेको छ । यो कुल करदाताको ३९.९ प्रतिशत हो । करकट्टी गर्ने निकायले लिएको स्थायी लेखा नम्बर १५ हजार १९८ रहेको छ ।
फागुन मसान्तसम्ममा मूल्य अभिवृद्धि करमा दर्ता भएका करदाता ३ लाख १४ हजार ७६ र अन्तःशुल्कमा दर्ता भएका करदाता संख्या १ लाख १६ हजार ५६० पुगेको मन्त्रालयको मासिक प्रतिवेदनमा उल्लेख छ ।
