कृषिको आधुनिकरणमा इजारायल सरकारको सहयोग रहने
नेपालका लागि इजराइलका राजदूत बेनी ओमरले नेपालको कृषि प्रविधिको आधुनिकीकरण र उत्पादनको व्यवसायीकरणको क्षेत्रमा नेपाललाई सहयोग गर्ने बताउनुभएको छ ।
नेपाल चेम्बर अफ कमर्सले आज यहाँ आयोजना गरेको कार्यक्रममा उहाँले कृषिप्रधान देशको आर्थिक समृद्धि हासिल गर्न यस क्षेत्रको आधुनिकीकरण गर्नुपर्ने बताउनुभएको हो । यसका लागि इजारायल सरकारको सहयोग रहने राजदुत ओमरको भनाइ थियो ।
कार्यक्रममा चेम्बरका अध्यक्ष राजेशकाजी श्रेष्ठले नेपालको कृषिको आधुनिकीकरण र पर्यटन विकासका लागि दुई देशबीच बलियो सहकार्यमा जोड दिनुभयो । द्विपक्षीय व्यापारलाई अभिवृद्धि गर्न, व्यापार र वाणिज्यमा हुने नवीन कुराको आदानप्रदान गर्न, दुई देशको व्यापार र लगानीको क्षेत्रमा संयुक्त अनुसन्धान र प्रकाशनको काम अगाडि बढाउन, आधुनिक प्रविधिको आदानप्रदान अवश्यक रहेको श्रेष्ठले बताउनु भयो ।
