यी हुन अमेरिकाले औंल्याएको नेपालमा लगानी निरुत्साहित हुने चार कारण
काठमाडौं, १६ साउन । अमेरिकाले नेपालमा राजनीतिक अस्थिरता, व्यापक भ्रष्टाचार, झन्झटिलो कर्मचारीतन्त्र तथा ऐन/नियमहरूको कार्यान्वयनमा एकरुपता नभएकाले नेपालमा सम्भावित वैदेशिक लगानीको वातावरणलाई निरुत्साहित बनाएको जनाएको छ ।
अमेरिकाको परराष्ट्र मन्त्रालयले हरेक वर्ष निकाल्ने ‘लगानीको वातावरणसम्बन्धी प्रतिवेदन २०२३’ को नेपालसम्बन्धी अंशमा लगानीको वातावरण नाजुक रहेको देखाइएको हो । ‘नेपाल सरकारले वैदेशिक लगानीलाई आकर्षित गर्न तत्पर रहेको सार्वजनिक रुपमा जानकारी गराए पनि त्यसको व्यावहारिक र अर्थपूर्ण कार्यान्वयन अझै भएको छैन,’ प्रतिवेदनमा भनिएको छ ।
अमेरिकाले नेपालको वैदेशिक लगानीको २.९ प्रतिशत हिस्सा ओगटेको छ । नेपाल सरकारले भने मुलुकमा लगानीमैत्री वातावरण निर्माण भएको भन्दै लगानी गर्न आकर्षित गर्दै आएको छ । तर अमेरिकाको यो प्रतिवेदनले थप लगानी निरुत्साहित हुने आशन्का बढाएको छ ।
