तीन अर्बभन्दा बढी नाफा आर्जन गरेको सिद्धार्थ बैंकको वितरणयोग्य मुनाफा घट्यो
काठमाडौं, १९ साउन । सिद्धार्थ बैंक लिमिटेडले गत आर्थिक वर्ष २०७९/८० को अन्त्यसम्म तीन अर्ब १९ करोड एक लाख रुपैयाँ खुद नाफा आर्जन गरेको छ । बैंकले शुक्रबार सार्वजनिक गरेको चौथो त्रैमाससम्मको अपरिष्कृत वित्तीय विवरण अनुसार बैंकको नाफा ९.९१ प्रतिशतले वृद्धि भएको हो । अघिल्लो आर्थिक वर्षको सोही अवधिसम्ममा बैंकले दुई अर्ब ९० करोड २४ लाख रुपैयाँ खुद नाफा आर्जन गरेको थियो ।
बैंकको खुद ब्याज आम्दानी २३.९७ प्रतिशत बढेको छ भने खुद फि तथा कमिशनबाट प्राप्त आम्दानी १२.०३ प्रतिशतले बढेको छ । गत आर्थिक वर्षको अन्त्यसम्म कम्पनी आठ अर्ब १७ करोड ८४ लाख रुपैयाँ खुद ब्याज आम्दानी गरेको छ । अघिल्लो वर्ष यस्तो अम्दानी ६ अर्ब ५९ करोड ६८ लाख रुपैयाँ गरेको थियो ।
गत वर्षको अन्त्यसम्ममा बैंकको वितरणयोग्य मुनाफा ७९ करोड ५७ लाख रुपैयाँ रहेको छ । यस अनुसार बैंकको प्रतिसेयर वितरणयोग्य आम्दानी ५ रुपैयाँ ६५ पैसा रहेको छ । अघिल्लो वर्ष वितरणयोग्य मुनाफा एक अर्ब ३५ करोड ९८ लाख रुपैयाँ रहेको थियो ।
१४ अर्ब ८ करोड ९९ लाख रुपैयाँ चुक्तापुँजी रहेको यस बैंकको जगेडा कोषमा १० अर्ब ५७ करोड ८९ लाख रुपैयाँ सञ्चित छ । बैंकले असार मसान्तसम्म दुई खर्ब २३ अर्ब ६५ करोड ४६ लाख रुपैयाँ निक्षेप संकलन गरेको छ भने एक खर्ब ८४ अर्ब चार करोड ५६ लाख रुपैयाँ कर्जा लगानी गरेको छ । एक वर्षमा बैंकको निक्षेप १६.७६ प्रतिशत बढेको छ भने कर्जा लगानी ३.०६ प्रतिशत बढेको हो ।
असार मसान्तसम्म बैंकको प्रतिशेयर आम्दानी २२ रुपैयाँ ६४ पैसा रहेको छ । असार मसान्तसम्ममा बैंकको मूल्य आम्दानी अनुपात ११.१७ गुणा रहेको छ भने प्रतिसेयर नेटवर्थ १८० रुपैयाँ ७३ पैसा रहेको छ ।