पेट्रोलको मूल्य प्रतिलिटर ४ रुपैयाँ बढ्यो
काठमाडौं, १९ चैत । नेपाल आयल निगमले पेट्रोलको मूल्य प्रतिलिटर ४ रुपैयाँ बढाएको छ । यससँगै सोमबार (आज) देखि काठमाडौंमा पेट्रोलको मूल्य प्रतिलिटर १७५ रुपैयाँ कायम भएको छ ।
निगमका अनुसार भारतबाटै पेट्रोलको मूल्य प्रतिलिटर ४ रुपैयाँ ७६ पैसाले बढेर आएसँगै आन्तरिक बजारमा पनि मूल्य समायोजन गरिएको हो ।
यस्तै डिजेल तथा मट्टितेलको मूल्य पनि ३९ पैसा बढेर आएको छ । तर हाललाई खुद्रा बिक्री मूल्यमा कुनै फेरबदल नगरी पुरानै मूल्य कायम गरिएको छ ।
यसैगरी एलपी ग्यासको मूल्य २७ रुपैयाँ ४४ पैसा बढेर आएको छ । मूल्य बढेर आए पनि नेपालमा हेरफेर भने नगरिएको निगमले विज्ञप्तिमा उल्लेख गरेको छ ।
