घरजग्गा कारोबारमा देखिएन सुधार
काठमाडौं, ७ असोज । भदौमा घरजग्गा कारोबारले गति लिन नसकेको देखिन्छ । गत साउनमा बढ्न नसकेको घरजग्गाको कारोबार भदौमा पनि ओरालो लागेको छ। नेपाल राष्ट्र बैंकले केही लचिलो नीति लिँदा पनि घरजग्गा कारोबारमा भने उत्साह देखिएन ।
भूमि व्यवस्थापन तथा अभिलेख विभागको तथ्यांकअनुसार चालु आर्थिक वर्षको भदौमा देशभर कुल ३२ हजार ७ सय ९८ लिखत पारित भएको छ।
साउनको तुलनामा भदौमा घरजग्गा कारोबार २५ प्रतिशतले ओरालो लागेको तथ्यांकले देखाउँछ । भदौमा ३ अर्ब ९ करोड रुपैयाँ राजस्व संकलन भएको छ। गत वर्षको भदौमा ३ अर्ब ४ करोड राजस्व उठेको थियो।
विभागका अनुसार साउनमा ४३ हजार ८ सय ३५ घरजग्गा कारोबार भएको थियो । गतवर्षको भन्दा केही सुधार भएपनि यसलाई खासै सुधार मान्न सकिने अवस्था छैन । गतवर्षको साउनमा ३९ हजार २ सय ६३ घरजग्गा कारोबार भएको थियो भने ३ अर्ब ८३ करोड ५० लाख राजस्व संकलन भएको थियो ।
आर्थिक वर्ष २०८०र८१ मा ५ लाख ४१ हजार ५०२ घरजग्गा कारोबार भएको थियो। अघिल्लो २०७९र०८० मा ४ लाख ६३ हजार ३२२ लिखत पास भएको थियो ।अघिल्लो आवमा भन्दा ७८ हजार १ सय ८० बढी लिखत पास भएको विभागको तथ्यांले देखाएको छ ।
