रेमिट्यान्स आप्रवाहमा वृद्धि, पुस महिनामै एक खर्ब २२ अर्ब नाघ्यो
काठमाडौं, २३ माघ । चालु आर्थिक वर्षको पुस महिनामा मात्रै एक खर्ब २२ अर्ब ६५ करोड रुपैयाँ बराबरको रेमिट्यान्स भित्रिएको छ । नेपाल राष्ट्र बैंकका अनुसार यो रकम मंसिर महिनाको तुलनामा ४ अर्ब रुपैयाँले बढी हो ।
यसअघि, चालु आर्थिक वर्षको मंसिर महिनामा मात्रै एक खर्ब १८ अर्ब रुपैयाँ बराबरको रेमिट्यान्स स्वदेश भित्रिएको थियो । पछिल्ला केही महिनामा रेमिट्यान्स आप्रवाह निरन्तर वृद्धि हुँदै गएको देखिएको छ । चालु आवको कात्तिक महिनाको तुलनामा मंसिरमा ४ अर्बले बढेको रेमिट्यान्स, मंसिरको तुलनामा पुस महिनामा पनि सोही दरमा बढेको राष्ट्र बैंकले जनाएको छ ।
चालु आर्थिक वर्षको पुस मसान्तसम्ममा विप्रेषण आप्रवाह ४.१ प्रतिशतले वृद्धि भई ७ खर्ब ६३ अर्ब ८ करोड रुपैयाँ पुगेको छ । गत आर्थिक वर्षको सोही अवधिमा विप्रेषण आप्रवाह २२.२ प्रतिशतले बढेको थियो ।
अमेरिकी डलरमा हेर्दा, विप्रेषण आप्रवाह १.१ प्रतिशतले वृद्धि भई ५ अर्ब ५८ करोड पुगेको छ । गत आर्थिक वर्षमा यस्तो आप्रवाह १९.५ प्रतिशतले वृद्धि भएको थियो ।
त्यस्तै, चालु आर्थिक वर्षको पुस मसान्तसम्ममा खुद द्वितीय आय (खुद ट्रान्सफर) ८ खर्ब ३२ अर्ब ७६ करोड रुपैयाँ पुगेको छ । गत आवको सोही अवधिमा यस्तो आय ७ खर्ब ९९ अर्ब ५४ करोड रुपैयाँ रहेको थियो ।
वैदेशिक रोजगारीमा जानेको संख्यामा पनि वृद्धि देखिएको छ । चालु आर्थिक वर्षको पुस मसान्तसम्ममा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ) लिने नेपालीको संख्या २ लाख ३० हजार ४३९ पुगेको छ भने पुनः श्रम स्वीकृति लिनेको संख्या १ लाख ६२ हजार ६२८ रहेको छ । गत आर्थिक वर्षको सोही अवधिमा नयाँ श्रम स्वीकृति लिनेको संख्या २ लाख ६ हजार ३९० र पुनः श्रम स्वीकृति लिनेको संख्या १ लाख ३३ हजार ९४० थियो ।
