अनलाइन मार्केटिङ र ब्राण्डिङका माध्यमबाट नयाँ पुस्तालाई हस्तकलामा जोड्ने महासंघको तयारी, यस्ताे छ नयाँ कार्ययाेजना (भिडियाे)

काठमाडाैं, ६ फागुन । मुलुकको निर्यात व्यापार, रोजगारी सिर्जना र अन्तर्राष्ट्रिय बजारमा नेपालको पहिचान कायम गर्न महत्वपूर्ण भूमिका खेल्दै आएको नेपाली हस्तकला क्षेत्रको प्रवद्र्धनका लागि नेपाल हस्तकला महासंघ शशक्त रुपमा अघि बढेको छ । गत पुस २७ गते सम्पन्न ४४ औं वार्षिक साधारणसभाबाट रविन्द्र शाक्यको अध्यक्षतामा महासंघको नयाँ नेतृत्व चयन भएको छ ।

भर्खरै चयन भएको नयाँ नेतृत्व समग्र हस्तकला उद्योग, उत्पादन, व्यवसाय, निकासी प्रवद्र्धन तथा यस क्षेत्रमा संलग्न उद्यमी तथा कलाकारको हित प्रवद्र्धन गर्ने नयाँ सोचका साथ अघि बढेको छ । सरकारका विभिन्न तह तथा नीजि क्षेत्रलाई एकै ठाउँमा ल्याइ अनलाइन मार्केटिङ र ब्राण्डिङका माध्यमबाट नयाँ पुस्तालाई यसमा जोड्न संघले विशेष पहल गर्ने महासंघका अध्यक्ष रविन्द्र शाक्यले बताउनुभयो ।

हस्तकलाका वस्तुको निर्यातलाई प्रतिस्पर्धी बनाइ र विश्मा व्याप्त आर्थिक मन्दीबीच पनि हस्तकला व्यवसायलाई गति दिन नीतिगत अप्ठ्याराहरु फुकाइ साना तथा घरेलु उद्योगमा आवद्ध भएका व्यवसायीहरुले पाउनु पर्ने प्रोत्साहनका लागि महासंघले विशेष पहल गर्ने अध्यक्ष शाक्यको भनाइ छ । हस्तकला क्षेत्रलाई भ्याट फ्रि भने पनि भ्याट मै दर्ता गरेर टेन्डरमा जानु पर्ने अवस्थाले सम्बन्धीत उत्पादक र व्यवसायी यस्तो लाभबाट बञ्चित हुनुपर्ने र यसले एकातिर सरकारको लागत बढ्ने र अर्को तिर सहि व्यक्ति यसको पहुँचमा नपुग्दा बिचौलियाको दबदवा बढ्ने बिषयमा सरकार सचेत हुनु पर्नेमा उहाँले जोड दिनुभयो ।

विश्व अर्थतन्त्रमाा छाएको पछिल्लोे विषम आर्थिक परिप्रेक्षमा पनि हस्तकलाका वस्तुहरुको माग बढ्दो छ । छिमेकी मुलुकहरुका साथ साथै अमेरिका अष्टेलिया युरोप जस्ता देशमा बढीरहेको माग हामीले पूर्ति गर्न सकेका छैनौं । व्यापार तथा निकासी प्रवद्र्धन केन्द्रका अनुसार वर्षेनी करिव १२ अर्ब रुपैयाँ वरावरको हस्तकलाका वस्तु निकासी भएको देखिन्छ । यद्यपी मुलुकमा व्याप्त राजनितिक तथा नीतिगत अस्थिरता, बेरोजगारी, युवा पलायनले नैरास्यता बढीरहेको अवस्थामा परम्परागत रुपमा गरिरहेको हस्तकला व्यसायलाई आधुनिकिकरण गरी शिल्प हस्तानान्तरण अहिलेको प्रमुख आवस्यकता देखिएको छ ।

लामो समयदेखि हस्तकलाले भोगिरहेको प्रमुख समस्या भनेको कच्चा पदार्थ तथा नियमित र स्थायी कामदारको अभाव पनि हो। मुलुकभित्रै भएका कच्चा पदार्थ पनि भौगोलिक विकटताले उद्योग सम्म पुर्याउन नसक्दा उत्पादन कम हुने तथा लागत बढ्ने समस्या यस उद्योगमा देखिन्छ । यता महासंघले उच्च शिक्षा पढ्दै गरेका विद्यार्थीहरुलाई हस्तकला सम्वन्धी शिप सिकाइ, आयआर्जनमा आवद्ध गराउन इकलानेपाल नामक छुट्टै अनलाइन मार्केटिङ प्लेर्फम विकास गरेको छ । यो प्लेटर्फम नयाँ पुस्ताका लागि ठूलो अवसर हुने बताइएको छ ।

पछिल्लो समय मुलुक भित्रै पनि नेपाली हस्तकलाको माग र प्रयोग बढीरहेको छ छ । बिवहा, ब्रतबन्ध, जन्मदिन जस्ता साँस्कृतिक महत्वका दिनहरुमा उपहार, चिनो दिनेदेखि सजावटका लागि समेत हस्तकला वस्तुहरुको प्रयोग बढीरहेको छ । यता सरकारले पनि २० प्रतिशत सम्म मँहगो भएपनि हस्तकलाका वस्तुहरु किन्ने नीति लिएको छ। त्यसैले नेपाली हस्तकलाको मौलिकता संरक्षण तथा यसको व्यवसायीकरणमा सरकार र नीजिक्षेत्रले हातेमालो गरेर अडाडी बढ्नु पर्ने महासंघको धारणा छ ।