निष्क्रिय कर्जाको सीमा बढाउँदै राष्ट्र बैंक, चार बैंक लाभान्वित हुने
काठमाडाैं, १९ फागुन । नेपाल राष्ट्र बैंकले निक्षेप संकलनको प्रावधानमा लचकता अपनाउँदै निष्क्रिय कर्जाको सीमा बढाएको छ । यसअघि निष्क्रिय कर्जाको सीमा ५ प्रतिशत रहेकोमा अब ८ प्रतिशत पुर्याइएको छ । यो निर्णयबाट चार बैंक लाभान्वित हुने भएका छन् । सोमबार राष्ट्र बैंकले खुलाएको ४ अर्ब ७९ लाख रुपैयाँ बराबरको निक्षेप बोलकबोलमा सहभागी हुन पाउनेको न्यूनतम मापदण्ड परिमार्जन गरिएको हो । यसअघि राष्ट्र बैंकको निक्षेप बोलकबोलमा सहभागी हुन पाउने बैंक तथा वित्तीय संस्थाको निष्क्रिय कर्जा बढीमा ५ प्रतिशत हुनुपर्ने व्यवस्था थियो । अहिले यसलाई परिमार्जन गरेर ८ प्रतिशत पुर्याइएको छ ।
पुस मसान्तको त्रैमासिक विवरण अनुसार कुमारी बैंकको निष्क्रिय कर्जा अनुपात ६.९६ प्रतिशत छ । त्यस्तै, नेपाल इन्भेष्टमेन्ट बैंकको ५.८६ प्रतिशत, लक्ष्मी सनराइज बैंकको ५.६७ प्रतिशत र प्रभु बैंकको ५.०६ प्रतिशत निष्क्रिय कर्जा रहेको सम्बन्धित बैंकले प्रकाशन गरेको वित्तीय विवरणमा उल्लेख गरिएको छ । पुरानो व्यवस्था कायम गर्दा यी बैंकहरु निक्षेप बोलबकोलमा सहभागी हुन पाउने अवस्था थिएन ।
नयाँ प्रावधानमा ग्रस एनपीएलको सीमा बढाएपछि नेट एनपीएलको प्रावधान भने थप गरिएको छ । यस अनुसार यस्तो प्रतिस्पर्धामा सहभागिता जनाउन खुद निष्क्रिय कर्जा अनुपात ३ प्रतिशतको सीमामा हुनुपर्ने व्यवस्था गरिएको छ । यी बैंकहरुले खुद निष्क्रिय कर्जाको विवरण भने सार्वजनिक गरेका छैनन् ।
