फागुन मसान्तसम्म बैंकहरुको नाफा २.८८ प्रतिशतले बढ्यो, नेपाल बैंकको नाफा दोब्बरभन्दा बढी

काठमाडाैं, २८ चैत्र । चालु आर्थिक वर्षको फागुन मसान्तसम्म २० वटा वाणिज्य बैंकहरुले जम्मा ४२ अर्ब ७५ करोड ८४ लाख रुपैयाँ खुद नाफा कमाएका छन् । यो नाफा अघिल्लो वर्षको सोही अवधिको तुलनामा २.८८ प्रतिशतले बढी हो । नेपाल राष्ट्र बैंकद्वारा प्रकाशित तथ्याङ्क अनुसार अघिल्लो वर्षको फागुन मसान्तसम्म बैंकहरुको नाफा ४० अर्ब ३३ करोड १ लाख रुपैयाँ रहेको थियो ।

नाफा वृद्धि गर्ने बैंकहरु

नाफा वृद्धिका हिसाबले नेपाल बैंक अग्रस्थानमा रहेको छ । बैंकको नाफा १३२.८९ प्रतिशतले वृद्धि भई २ अर्ब ९८ करोड ७९ लाख रुपैयाँ पुगेको छ । यसैगरी, एनआईएमबी (NIMB) को नाफा ४५.६८ प्रतिशतले, ग्लोबल आइएमई को ३७.७६ प्रतिशतले र प्रभू बैंक को ३९.६४ प्रतिशतले वृद्धि भएको छ ।

नाफा घट्ने बैंकहरु

बैंकहरुको समग्र नाफा केही बढेको भए पनि ९ वटा बैंकको नाफा भने घटेको छ । सबैभन्दा धेरै नाफा घट्ने बैंक एनआईसी एशिया हो, जसको नाफा ६७.७४ प्रतिशतले घटेर ८१ करोड ९९ लाख रुपैयाँमा झरेको छ । त्यस्तै, कृषि विकास बैंक को नाफा ६२.६६ प्रतिशतले, राष्ट्रिय वाणिज्य बैंक को ४०.०९ प्रतिशतले र कुमारी बैंक को ३१.९७ प्रतिशतले घटेको देखिन्छ ।

सर्वाधिक नाफा कमाउने बैंकहरु

सर्वाधिक नाफा कमाउने बैंकको सूचीमा नबिल बैंक शीर्ष स्थानमा छ । बैंकले ८ महिनामा ४ अर्ब ७८ करोड ७६ लाख रुपैयाँ नाफा कमाएको छ, जुन अघिल्लो वर्षको तुलनामा १.३४ प्रतिशतले मात्र बढी हो । त्यसपछि ग्लोबल आइएमई ले ४ अर्ब ७२ करोड ९४ लाख रुपैयाँ र एनआईएमबी ले ४ अर्ब ८५ लाख ७३ हजार रुपैयाँ नाफा कमाएका छन् ।