एक लाख कित्तासम्म आवेदन दिन सकिने गरी पियोर इनर्जीको आईपीओ निष्काशन
काठमाडौं, २८ चैत्र। पियोर इनर्जी लिमिटेडको साधारण शेयर (आईपीओ) निष्काशन गरिएको छ । यस कम्पनीको आईपीओ बिहीबारदेखि निष्काशन तथा बिक्री खुल्ला गरिएको हो ।
यसअघि कम्पनीले आयोजना प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपालीहरूका लागि निष्काशन गरेको थियो । आजदेखि भने सर्वसाधारणका लागि आईपीओ निष्काशन गरिएको हो । कम्पनीले ११ करोड ९५ लाख २० हजार रुपैयाँ बराबरको ११ लाख ९५ हजार २०० कित्ता शेयर सर्वसाधारणका लागि बिक्रीमा ल्याएको छ । जसको प्रतिकित्ता १०० रुपैयाँ अंकित मूल्य तोकिएको छ ।
सर्वसाधारणले कम्पनीको आईपीओमा न्यूनतम १० कित्तादेखि अधिकतममा १ लाख कित्ताका लागि आवेदन दिन सक्नेछन्। वैशाख २ गतेसम्म बिक्री खुल्ला गरिने कम्पनीले जनाएको छ । आईपीओ निष्काशन तथा बिक्री प्रबन्धक नबिल इन्भेष्टमेन्ट बैंकिङ्ग लिमिटेड रहेको छ।
