छ महिनापछि पुनःसञ्चालनमा हेटौंडा सिमेन्ट उद्योग, दैनिक ३०० क्विन्टल उत्पादनको लक्ष्य
काठमाडाैं, ५ वैशाख । झण्डै छ महिनाको अवरोधपछि हेटौंडा सिमेन्ट उद्योग पुनः सञ्चालनमा आएको छ। औद्योगिक समस्याका कारण लामो समय बन्द रहेको यस सरकारी स्वामित्वको सिमेन्ट उद्योग अब दैनिक ३०० क्विन्टल सिमेन्ट उत्पादन गर्ने लक्ष्यका साथ पुनः सञ्चालनमा ल्याइएको हो।
सन् १९७६ मा स्थापना गरिएको हेटौंडा सिमेन्ट उद्योग मुलुककै पुरानो सिमेन्ट उत्पादन गर्ने सरकारी उद्योग हो। तर पछिल्लो केही वर्षयता उपकरण पुराना हुनुका साथै आर्थिक र व्यवस्थापनगत समस्याले गर्दा यो उद्योग पटक–पटक बन्द हुँदै आएको थियो।
उद्योग स्रोतका अनुसार, मर्मतसम्भार तथा आवश्यक तयारीपछि अब उद्योगलाई नियमित रूपमा सञ्चालनमा ल्याउने प्रयास भइरहेको छ। हालको चरणमा उत्पादन क्षमता सीमित गरिएको भए पनि क्रमशः यसलाई बढाउँदै लैजाने योजना रहेको उद्योगका महाप्रबन्धकले जानकारी दिए।
उनका अनुसार, “हाल हामीले दैनिक ३०० क्विन्टल उत्पादन गर्ने लक्ष्यसहित मेसिन परीक्षण सफलतापूर्वक सम्पन्न गरेका छौं। अब केही दिनमा नै बजारमा नयाँ उत्पादन देखिन थाल्नेछ।”
हेटौंडा सिमेन्टको बजार मूल्य प्रतिस्पर्धी हुने विश्वास लिइएको छ, र यसले आन्तरिक उत्पादन बढाउन सहयोग पुग्ने बताइएको छ। साथै, स्थानीयस्तरमा रोजगारी सिर्जना गर्ने र राष्ट्रिय उत्पादनमा टेवा पुर्याउने उद्योगको लक्ष्य छ।
प्रदेश तथा संघीय सरकारको समन्वयमा उद्योग पुनः सञ्चालनमा ल्याइएको हो। यसका लागि करिब ५ करोड रुपैयाँ बराबरको मर्मतसम्भार लागत खर्च गरिएको बताइएको छ। अबको प्राथमिकता उत्पादन स्थायित्व कायम गर्दै गुणस्तरीय सिमेन्ट उत्पादन गर्ने रहेको उद्योग प्रशासनको भनाइ छ।
