९ महिनामा साढे १८ अर्ब बराबरको झन्डै आठ हजार विद्युतीय सवारी नेपाल आयात

विशेषगरी चीन, भारत, कोरिया, अमेरिका र जर्मनी लगायतका देशहरूबाट यी सवारीसाधनहरू नेपाल भित्रिएका हुन्। चैत महिनामा मात्र ८७८ वटा ईभी आयात हुँदा १ अर्ब ९७ करोड २५ लाख रुपैयाँ बराबरको कारोबार भएको छ। यस्तै फागुनमा ८३३ वटा (१ अर्ब ८९ करोड ९३ लाख), माघमा ७७६ वटा (१ अर्ब ६४ करोड २३ लाख), पुसमा ७८३ वटा (१ अर्ब ८३ करोड ५९ लाख), मंसिरमा १ हजार २१० वटा (२ अर्ब ९० करोड ११ लाख), कात्तिकमा ९६९ वटा (२ अर्ब २५ करोड ४८ लाख), असोजमा ९१६ वटा (२ अर्ब २८ करोड ८५ लाख), भदौमा १ हजार २२१ वटा (२ अर्ब ९३ करोड ४ लाख) र साउन महिनामा ३८१ वटा (८९ करोड ९७ लाख) ईभी नेपाल भित्रिएका थिए।

हाल मासिक औसतमा करिब ८८५ वटा विद्युतीय सवारी नेपाल भित्रिने गरेको देखिन्छ। सरकारले विद्युतीय सवारीसाधनको प्रयोगलाई प्रोत्साहन गर्न कर संरचना सहज बनाएको छ, जसले गर्दा आयात तथा प्रयोगमा वृद्धि भएको हो। हरित ऊर्जा प्रवर्द्धन गर्ने सरकारको नीतिका कारण विद्युतीय सवारीप्रतिको आकर्षण बढ्दै गएको देखिन्छ, जसले देशमा हरित यातायात प्रणालीको सम्भावना बलियो बनाएको छ।