संघीय संसद्का चार समिति आज बैठकमा, वैदेशिक भ्रमणदेखि भ्रष्टाचारको वार्षिक प्रतिवेदनमा छलफल
काठमाडाैं, २४ वैशाख । संघीय संसद्का चार फरक समितिहरू आज विभिन्न विषयमा छलफल गर्न बैठकमा बस्दैछन्। अन्तर्राष्ट्रिय सम्बन्ध तथा पर्यटन समिति, संघीय सशक्तीकरण तथा राष्ट्रिय सरोकार समिति, विधायी व्यवस्थापन समिति र सार्वजनिक नीति तथा प्रत्यायोजित कानून समिति आजको बैठकमा सामेल छन्।
अन्तर्राष्ट्रिय सम्बन्ध तथा पर्यटन समितिको बैठक बिहान ८:४५ बजे सिंहदरबारमा बस्नेछ। यस बैठकमा वैदेशिक मामिला मन्त्री र सचिवसँग वैदेशिक भ्रमण तथा अन्य समसामयिक विषयमा छलफल गरिनेछ।
संघीय सशक्तीकरण तथा राष्ट्रिय सरोकार समितिको बैठक बिहान ११:०० बजे बस्नेछ। यस बैठकमा अख्तियार दुरुपयोग अनुसन्धान आयोगको आर्थिक वर्ष २०८०/८१ को ३४औं वार्षिक प्रतिवेदनको समीक्षा गरिनेछ।
विधायी व्यवस्थापन समितिको बैठक बिहान ११:३० बजे तोकिएको बैठक कक्षमा बस्नेछ। यस बैठकमा जलयान (सञ्चालन र व्यवस्थापन) विधेयक, २०८१ को मस्यौदा प्रतिवेदनमाथि छलफल हुनेछ।
यस्तै, सार्वजनिक नीति तथा प्रत्यायोजित कानून समितिको बैठक पनि बिहान ११:३० बजे बस्नेछ। उक्त बैठकमा बारपाक क्षेत्रमा भूकम्पपछिको पुनर्निर्माण कार्यको अनुगमनमा केन्द्रित छलफल गरिनेछ।
