डा. विश्वनाथ पौडेलले नेपाल राष्ट्र बैंकको गभर्नरको पदभार सम्हाले
काठमाडाैं, ७ जेष्ठ । नेपाल राष्ट्र बैंकका नव नियुक्त गभर्नर डा. विश्वनाथ पौडेलले बुधबार पद तथा गोपनीयताको शपथ लिएसँगै औपचारिक रूपमा कार्यभार सम्हालेका छन्।
शपथग्रहण कार्यक्रम सर्वोच्च अदालतका प्रधानन्यायाधीश प्रकाशमान सिंह राउतको उपस्थितिमा सम्पन्न भयो। नेपालको संविधानअनुसार राष्ट्र बैंकको गभर्नरले प्रधानन्यायाधीश समक्ष शपथ लिनुपर्ने प्रावधानअनुसार शपथग्रहण गरिएको हो।
शपथ पछि डा. पौडेल नेपाल राष्ट्र बैंक पुगेर १८औँ गभर्नरको रूपमा औपचारिक रूपमा पदभार ग्रहण गरेका छन्।
मंगलबार बसेको मन्त्रिपरिषद्को बैठकले डा. पौडेललाई नेपाल राष्ट्र बैंकको गभर्नरमा नियुक्त गरेको थियो। उनी यसअघि राष्ट्रिय योजना आयोगका उपाध्यक्षको रूपमा कार्यरत थिए र आर्थिक नीतिनिर्माण, बजेट योजना र मौद्रिक नीति सम्बन्धी विषयमा दीर्घ अनुभव बोकेका विज्ञ हुन्।
गभर्नर पौडेलले पदभार ग्रहणसँगै देशको मौद्रिक नीति, वित्तीय स्थायित्व तथा बैंकिङ प्रणालीमा सुधार ल्याउने कार्यमा प्राथमिकता दिने अपेक्षा गरिएको छ। अब उनको नेतृत्वमा राष्ट्र बैंकले आगामी आर्थिक नीतिहरू तय गर्नेछ।
