नेपालको इतिहासमै पहिलोपटक पूर्वप्रधानमन्त्रीविरुद्ध भ्रष्टाचार मुद्दा, माधवकुमार नेपालको सांसद पद निलम्बन

काठमाडाैं, २२ जेष्ठ । नेपालका इतिहासमै पहिलोपटक कुनै पूर्वप्रधानमन्त्रीविरुद्ध भ्रष्टाचारको मुद्दा दायर गरिएको छ। अख्तियार दुरुपयोग अनुसन्धान आयोगले नेकपाका अध्यक्ष तथा पूर्वप्रधानमन्त्री माधवकुमार नेपालविरुद्ध विशेष अदालतमा मुद्दा दायर गरेको हो।

यो मुद्दा पतञ्जली योगपीठसँग सम्बन्धित विवादास्पद जग्गा किनबेच प्रकरणसँग जोडिएको छ। आयोगले बिहीबार विशेष अदालतमा मुद्दा दायर गर्दै नेपालसहित अन्य केही व्यक्तिहरूमाथि भ्रष्टाचार, कानुन उल्लङ्घन, तथा राज्यलाई आर्थिक हानी पुर्‍याएको आरोप लगाएको छ।

पूर्वप्रधानमन्त्री नेपालको नेतृत्वमा रहेको मन्त्रिपरिषद्ले काभ्रेपलाञ्चोकको बञ्चा गाउँमा रहेको ८१५ रोपनी जग्गा पतञ्जलीलाई औषधीय र शैक्षिक प्रयोजनका लागि विशेष छुटस्वरूप दिने निर्णय गरेको थियो। तर, उक्त जग्गा पतञ्जलीले केही समयमै बिक्री गर्न सुरु गरेपछि कानुन उल्लङ्घन भएको ठहर गर्दै अख्तियारले अनुसन्धान अघि बढाएको थियो।

यो मुद्दा दर्तापछि माधवकुमार नेपालको प्रतिनिधिसभा सदस्य पद स्वचालित रूपमा निलम्बनमा परेको छ। नेपालको संवैधानिक प्रावधानअनुसार कुनै सार्वजनिक पदमा रहेका व्यक्तिविरुद्ध भ्रष्टाचार मुद्दा दायर भएमा सो पद स्वतः निलम्बन हुन्छ।

यो नेपालकै इतिहासमा पहिलोपटक हो, जब कुनै पूर्वप्रधानमन्त्रीमाथि भ्रष्टाचारको मुद्दा दर्ता भएको छ। साथै, कुनै मन्त्रिपरिषद् निर्णयलाई प्रत्यक्षरूपमा कानुनी कारबाहीको दायरामा ल्याइएको यो पहिलो घटना पनि हो। यसले नेपाली राजनीतिक र कानुनी इतिहासमा नयाँ मिसाल कायम गरेको छ।