आर्थिक वर्षको अन्तमा भुक्तानी सन्तुलनमा झिनो सुधार, ७५५ अर्ब रेमिट्यान्स भित्रियो

काठमाडौ, ५ भदौ । गत आर्थिक वर्षको अन्तमा भुक्तानी सन्तुलनको अवस्थामा झिनो सुधार आएको छ । आर्थिक वर्ष २०७४–७५ मा ९६ करोड रुपैँया भुक्तानी सन्तुलन बचतमा रहेको नेपाल राष्ट्र बैंकले जनाएको छ । सो भन्दा अघिल्लो वर्ष भुक्तानी सन्तुलन ८२ अर्ब ११ करोड रुपैँयाले बचतमा रहेको थियो । उच्च आयात, रेमिट्यान्स आप्रवाहमा खासै सुधार हुन नसक्नु र प्रत्यक्ष वैदेशिक लगानीको स्थिति कमजोर हुँदा भुक्तानी सन्तुलनको अवस्था कमजोर देखिएको हो । गत आर्थिक वर्षमा चालु खाता घाटा अत्याधिक बढेर २४५ अर्ब रुपैँया पुगेको छ, जुन मुलुकको कुल गार्हस्थ उत्पादनको ८.२ प्रतिशत हुनआउँछ ।
अघिल्लो आर्थिक वर्षमा आयात २५ दशमलव ५ प्रतिशतले वृद्धि भई १२ खर्ब ४२ अर्ब ८३ करोड रुपैँया पुगेको छ भने निर्यात ८१ अर्ब १९ करोड रुपैँया रहेको छ । आयात र निर्यातको खाडल थप विस्तार हुँदा व्यापार घाटा २६ दशमलव ७ प्रतिशतले विस्तार भई ११ खर्ब ६१ अर्ब रुपैँया पुगेको छ । वस्तु व्यापारमा ठूलो घाटा रहे पनि सेवा व्यापारतर्फ २ अर्ब रुपैँया नाफा भएको छ । तर सेवा व्यापारतर्फको नाफा भने संकुचित हुँदै गएको छ ।
गत वर्षमा रहेको मुलुकसँग रहेको विदेशी विनिमय सञ्चितिले ९ दशमलव४ महिनाको वस्तु तथा सेवाको आयात धान्न पर्याप्त हुन्छ । विदेशी विनिमय सञ्चिति ८ महिनाको वस्तु तथा आयात धान्न पुग्नेभन्दा कम भए खतराको घण्टी बजेको भनेर बुझ्नुपर्छ ।
नेपाल राष्ट्र बैंकका अनुसार गत आर्थिक वर्षमा ७५५ अर्ब रुपैँया रेमिट्यान्स भित्रिएको छ भने १७ अर्ब ५१ करोड रुपैँया प्रत्यक्ष वैदेशिक लगानी आएको छ । खासगरी गत आर्थिक वर्षको अन्तिमतिर अमेरिकी डलर मजबुत हुँदा विप्रेषण पठाउने क्रम बढेको छ, अर्कोतर्फ अमेरिकी डलरको तुलनामा नेपाली रुपैँयाको तीव्र अवमूल्यनले नेपाली रुपैँयामा रेमिट्यान्सको वृद्धिदर पनि केही बढेको छ ।
गत आर्थिकवर्षको अन्तिम महिनामा उपभोक्ता मुद्रास्फिति ४ दशमलव ६ प्रतिशत रहेको छ भने गत आर्थिक वर्षको औसत मुद्रा स्फिति ४ दशमलव २ प्रतिशत रह्यो । नेपाल राष्ट्र बैंकले चालु आर्थिक वर्ष २०७५–७६ मा गत आर्थिक वर्षहरुमा जस्तै उच्च आर्थिक वृद्धिदर कायम हुने बताएको छ ।