वैकल्पिक वित्त विधेयकदेखि पानी स्रोत विधेयकसम्म : संघीय संसद्को दुबै सदनमा आज महत्वपूर्ण प्रस्तावहरू प्रस्तुत हुँदै
काठमाडाैं, ३१ असार । संघीय संसद्का दुबै सदन (प्रतिनिधिसभा र राष्ट्रियसभा) मा आज महत्त्वपूर्ण विधेयक र प्रतिवेदनहरू प्रस्तुत हुने भएका छन्। प्रतिनिधिसभाको बैठक दिउँसो १ बजेका लागि र राष्ट्रियसभाको बैठक १:१५ बजेका लागि बोलाइएको संसद् सचिवालयले जानकारी दिएको छ।
प्रतिनिधिसभामा पेश हुँदै वैकल्पिक वित्त विधेयक र जलजहाजसम्बन्धी प्रस्ताव
उपप्रधान तथा अर्थमन्त्री विष्णुप्रसाद पौडेलले प्रतिनिधिसभामा ‘वैकल्पिक वित्तीय स्रोत परिचालन विधेयक, २०८१’ माथि विचार गरियोस भन्ने प्रस्ताव प्रस्तुत गर्ने कार्यक्रम रहेको छ। यस विधेयकमार्फत सरकारको वित्तीय स्रोत विविधिकरण गर्ने उद्देश्य राखिएको छ।
त्यसैगरी भौतिक पूर्वाधार तथा यातायातमन्त्री देवेन्द्र दाहालले ‘जलजहाज सञ्चालन तथा व्यवस्थापन विधेयक, २०८१’ लाई विचारार्थ प्रस्तुत गर्नेछन्। यो विधेयक नेपालमा जलजहाज सञ्चालनको कानुनी ढाँचा बनाउने प्रारम्भिक प्रयासको रूपमा हेरिएको छ।
सार्वजनिक लेखा समितिको २३औं प्रतिवेदन संसदमा टेबल हुँदै
सार्वजनिक लेखा समितिका सभापति ऋषिकेश पोखरेलले ‘सार्वजनिक लेखा समितिको २३औं वार्षिक प्रतिवेदन, २०८२’ संसदमा पेस गर्नेछन्। प्रतिवेदनमा सरकारी खर्च, आर्थिक अपचलन र सार्वजनिक वित्तीय अनुशासनका विषय समेटिएको छ। त्यसपछि सभामुख देवराज घिमिरेले राष्ट्रपतिको कार्यालयबाट प्राप्त विधेयक प्रमाणीकरण सम्बन्धी पत्र संसदमा वाचन गर्ने कार्यक्रम तय गरिएको छ।
राष्ट्रिय सभामा संघीय निजामती सेवा विधेयक र पानी स्रोत विधेयक प्रस्तुत हुँदै
राष्ट्रिय सभाको बैठकमा ‘संघीय निजामती सेवा विधेयक, २०८०’ माथि विचार गरियोस भन्ने प्रस्ताव संघीय मामिला तथा सामान्य प्रशासन मन्त्री राजकुमार गुप्ताले प्रस्तुत गर्नेछन्। यो विधेयक प्रतिनिधिसभाबाट पारित भइसकेको छ र अब राष्ट्रिय सभामा छलफल हुनेछ।
त्यसैगरी, ऊर्जा, जलस्रोत तथा सिँचाइमन्त्री दीपक खड्काले ‘पानी स्रोत विधेयक, २०८१’ लाई विधायन व्यवस्थापन समितिमा दफावार छलफलका लागि पठाइयोस भन्ने प्रस्ताव पनि प्रस्तुत गर्ने कार्यक्रम रहेको छ। यस विधेयकले नेपालको जलस्रोत व्यवस्थापनसम्बन्धी नयाँ कानुनी संरचना ल्याउने प्रयास गरेको छ।
