कमलादी स्काई वाकमा साहसिक खेलको नयाँ युग, ७ करोडको लगानी योजना
काठमाडाैं, १२ साउन । काठमाडौंको कमलादी स्थित ७५ मिटर अग्लो स्काई वाक टावर अब केवल दृश्यावलोकनका लागि मात्र नभई साहसिक खेलहरूको रोमाञ्चक अनुभव लिनका लागि पनि बनाइने भएको छ। वोन्डर्स नेपाल प्रालि ले उक्त टावरलाई ‘एक्स्ट्रीम एड्भेञ्चर जोन’ मा परिणत गर्न ७ करोड रुपैयाँको पूरक लगानी योजना अघि सारेको छ।
कम्पनीले हालै वन तथा वातावरण मन्त्रालयमा नयाँ संरचनाका लागि आवश्यक पर्यावरणीय प्रभाव मूल्याङ्कन प्रतिवेदन पेश गरेको छ। योजनाअनुसार स्काई वाक टावरमा २० प्रकारका साहसिक खेल समावेश गरिनेछन्। यी खेलमा बन्जी जम्प, स्काई साइकलिङ, जीपलाइन, ह्यामक राइड, एज वाक, स्काई चेयर, फ्रिफल जम्प, क्लाइम्बिङ, स्वीङ–३६०, र रिभर्स बन्जी लगायतका रोमाञ्चक गतिविधिहरू समावेश हुनेछन्।
विशेष आकर्षणहरूमा २०० मिटरको जीपलाइन, १५० मिटरको ह्यामक राइड, फूल ग्लास सेल्फी डेक, स्नो रूम, र हाई रोप कोर्स पनि समावेश छन्। यस परियोजनाले राजधानीमा पहिलो पटक फ्रिफल जम्प र रिभर्स बन्जी जस्ता साहसिक खेलहरू उपलब्ध गराउनेछ, जुन यसअघि मुख्यतया पोखरा, कुश्मा र अन्य विदेशी गन्तव्यहरूमा मात्रै थिए।
आर्थिक दृष्टिकोणबाट पनि यो आयोजना महत्वपूर्ण हुने अपेक्षा गरिएको छ। पर्यावरणीय प्रभाव मूल्याङ्कन अनुसार, नयाँ संरचनाहरू सञ्चालनमा आएपछि दैनिक ५०० पर्यटक आकर्षित हुने अनुमान गरिएको छ। यो अहिलेको २००-२५० आगन्तुकको तुलनामा दुई गुणा बढी हुने अपेक्षा गरिएको छ, जसले काठमाडौंको पर्यटन चक्रमा ठुलो चहलपहल ल्याउनेछ।
कुल लगानी ८९ करोड रुपैयाँ पुग्ने योजनाले काठमाडौंको पर्यटन, सामाजिक र आर्थिक दृष्टिकोणबाट महत्वपूर्ण योगदान पुर्याउने विश्वास गरिएको छ। यसको निर्माण कार्यमा ८२ करोड रुपैयाँ खर्च भइसकेको छ, र थप पूरक लगानीपछि कुल लागत ८९ करोड रुपैयाँ हुने अपेक्षा गरिएको छ।
परियोजनामा ध्वनि प्रदूषण, जमिनको कम्पन, र ट्राफिक व्यवस्थापन जस्ता विषयहरूलाई न्यूनतम प्रभाव पार्ने उद्देश्यका साथ कार्ययोजना तयार गरिएको छ। यसलाई नेपालका निजी क्षेत्रबाट गरिएको अग्रगामी सहरी मनोरञ्जन परियोजनाको रूपमा लिइएको छ।
