जीवन बीमाले ७८ अर्ब भुक्तानी, तर ६ अर्बभन्दा बढी अझै रोक्का
काठमाडौं, १३ भदौ । जीवन बीमा कम्पनीहरूले बीमितलाई सहयोग गर्ने दाबी गर्दै गत आर्थिक वर्ष २०८१/८२ मा साढे ७८ अर्ब रुपैयाँभन्दा बढी दाबी भुक्तानी गरेका छन्। अघिल्लो वर्षको तुलनामा भुक्तानी १९ प्रतिशतले बढेको देखिन्छ। तर भुक्तानी हुन बाँकी रकम पनि उल्लेख्य मात्रामा वृद्धि भई ६ अर्ब ७७ करोड रुपैयाँ पुगेको छ।
१४ जीवन बीमा कम्पनीहरूले संयुक्त रूपमा गत वर्ष ७८ अर्ब ७२ करोड १ लाख रुपैयाँ दावी भुक्तानी गरेका छन्। अघिल्लो वर्ष उनीहरूले ६६ अर्ब ४ करोड २१ लाख रुपैयाँ मात्र भुक्तानी गरेका थिए। यसरी दावी भुक्तानीमा १९.२ प्रतिशत वृद्धि भएको देखिन्छ।
सबैभन्दा धेरै दावी भुक्तानी नेपाल लाइफ इन्स्योरेन्सले गरेको छ। कम्पनीले गत वर्ष मात्र १९ अर्ब १९ करोड ६४ लाख रुपैयाँ भुक्तानी गरेको छ, जुन अघिल्लो वर्षको तुलनामा २८.०१ प्रतिशत धेरै हो। त्यसपछि एलआइसी नेपालले १२ अर्ब ५९ करोड २ लाख रुपैयाँ र नेशनल लाइफ इन्स्योरेन्सले ३२.९४ प्रतिशत बढाएर ११ अर्ब ७ करोड १२ लाख रुपैयाँ दावी भुक्तानी गरेका छन्।
यस्तै, एशियन लाइफले ३२.६ प्रतिशत वृद्धि गर्दै ६ अर्ब १८ करोड ८९ लाख रुपैयाँ, हिमालयन लाइफले ७ अर्ब ३३ करोड ८५ लाख, राष्ट्रिय जीवन बीमाले ६ अर्ब ५६ करोड, सूर्यज्योतिले ३ अर्ब ६९ करोड, मेट लाइफले १ अर्ब ९१ करोड, सानिमा रिलायन्सले १ अर्ब ७७ करोड, सन नेपालले १ अर्ब ५७ करोड, रिलायवल नेपालले १ अर्ब ४३ करोड, आइएमई लाइफले १ अर्ब २८ करोड र प्रभू महालक्ष्मीले १ अर्ब १५ करोड रुपैयाँ दावी भुक्तानी गरेका छन्।
तर दावी भुक्तानीमा वृद्धि भए पनि भुक्तानी हुन बाँकी रकम झन् बढेको छ। गत वर्ष भुक्तानी हुन बाँकी रकम ५४.८९ प्रतिशतले बढेर ६ अर्ब ७७ करोड ५५ लाख रुपैयाँ पुगेको विवरणले देखाएको छ। अघिल्लो वर्ष बाँकी रकम ४ अर्ब ३७ करोड ४३ लाख रुपैयाँ मात्र थियो।
सबैभन्दा धेरै भुक्तानी हुन बाँकी रकम नेशनल लाइफको रहेको छ। कम्पनीले २ अर्ब ५१ लाख रुपैयाँभन्दा बढी अझै भुक्तानी गर्न बाँकी छ। नेपाल लाइफको पनि २ अर्ब २ करोड २४ लाख रुपैयाँ भुक्तानी हुन बाँकी छ।
यस्तै, एलआइसी नेपालको ९९ करोड २७ लाख, सानिमा रिलायन्सको ४१ करोड ६४ लाख, सिटिजन लाइफको १२ करोड ४८ लाख, एशियनको ७ करोड १८ लाख, सन नेपालको २ करोड ६ लाख र प्रभू महालक्ष्मी लाइफको १ करोड ९० लाख रुपैयाँ भुक्तानी हुन बाँकी छ।
यद्यपि, रिलायवल नेपाल, मेट लाइफ, हिमालयन लाइफ र आइएमई लाइफको बाँकी दावी भुक्तानी भने घटेको छ। राष्ट्रिय जीवन बीमाको बाँकी रकम शून्य रहेको विवरणमा उल्लेख छ।
