सहुलियतपूर्ण कर्जा लिने ऋणीको विवरण अब त्रैमासिक सार्वजनिक गरिँदै
काठमाडौं, १३ भदौ । नेपाल राष्ट्र बैंकले बैंक तथा वित्तीय संस्थाहरूमाथि सहुलियतपूर्ण कर्जा लिने ऋणीहरूको विवरण सार्वजनिक गर्ने नयाँ व्यवस्था लागू गरेको छ। राष्ट्र बैंकले हालै संशोधन तथा परिमार्जन गरी जारी गरेको एकीकृत निर्देशन, २०८१ मार्फत यस्तो व्यवस्था गरिएको हो।
नयाँ व्यवस्थाअनुसार अबदेखि बैंक तथा वित्तीय संस्थाले सहुलियतपूर्ण कर्जा लिने ऋणीहरूको छुट्टाछुट्टै विवरण आफ्नो वेबसाइटमा त्रैमासिक रूपमा प्रकाशित गर्नुपर्नेछ। यसले सहुलियतपूर्ण कर्जा वितरणमा पारदर्शिता र उत्तरदायित्व सुनिश्चित गर्ने अपेक्षा गरिएको छ।
निर्देशनमा उल्लेख छ, “बैंक तथा वित्तीय संस्थाले ‘सहुलियतपूर्ण कर्जाका लागि ब्याज अनुदान सम्बन्धी एकीकृत कार्यविधि, २०७५’ बमोजिम हाल कायम रहेका ऋणी र ‘सहुलियतपूर्ण कर्जाका लागि ब्याज अनुदान सम्बन्धी कार्यविधि, २०८२’ बमोजिम सहुलियतपूर्ण कर्जा प्राप्त गरेका ऋणीको छुट्टाछुट्टै विवरण आफ्नो वेबसाइटमार्फत त्रैमासिक रूपमा सार्वजनिक गर्नुपर्नेछ।”
यस कदमले सहुलियतपूर्ण कर्जा प्रवाहको अवस्था सहज निगरानी गर्न सकिने र लाभान्वित हुने ऋणीहरूको वास्तविक पहुँचबारे जनमानसमा स्पष्ट जानकारी पुग्ने राष्ट्र बैंकको विश्वास छ। अब बैंक तथा वित्तीय संस्थाहरूले नियमित रूपमा विवरण सार्वजनिक गर्नुपर्ने हुँदा सहुलियतपूर्ण कर्जामा हुने सम्भावित अनियमिततामाथि पनि अंकुश लगाउने अपेक्षा गरिएको छ।
