पेट्रोल पम्प ठप्प, उपत्यकामा आज अभाव
काठमाडाैं, २४ भदाै । काठमाडौं उपत्यकामा आज पेट्रोलको अभाव देखिएको छ। जेनजी आन्दोलनको दोस्रो दिन उपत्यकाका विभिन्न स्थानमा प्रदर्शन भइरहेको अवस्थामा सुरक्षाको कारण देखाउँदै पेट्रोल पम्पहरू बन्द गरिएको हो।
उपत्यकाका मुख्य पम्पहरू बिहानैदेखि नै सेवा नदिँदा पेट्रोल भर्न आएका सर्वसाधारण निराश भएर फर्किनुपरेको छ। आन्दोलनकै बीचमा सम्भावित सुरक्षाजन्य जोखिमलाई नियन्त्रणमा लिन सुरक्षा निकायले संवेदनशील स्थानमा पेट्रोल बिक्री रोक्ने निर्णय गरेको बुझिएको छ।
पेट्रोल आपूर्ति ठप्प हुँदा दैनिक यात्रुहरू, सवारी चालकहरू र आपतकालीन सेवामा संलग्न व्यक्तिहरूलाई विशेष असुविधा भएको छ। सामान्यतया व्यस्त देखिने पेट्रोल पम्पहरू आज सुनसान बनेका छन्।
स्थानीयवासीहरूले पेट्रोल अभावले दैनिक जीवन प्रभावित भएको भन्दै चाँडै समाधान खोज्न सम्बन्धित निकायसँग माग गरेका छन्।



