`ओझाको पद सुरक्षित, सर्वोच्चको अन्तरिम आदेश
काठमाडाैं, २४ भदाै । नेपाल बीमा प्राधिकरणका अध्यक्ष शरद ओझालाई सरकारले गरेको बर्खास्ती तत्काल कार्यान्वयन नगर्न सर्वोच्च अदालतले आदेश जारी गरेको छ।
सोमबार न्यायाधीश शारङ्गा सुवेदीको एकल इजलासले अल्पकालीन अन्तरिम आदेश दिँदै ओझाको पद सुरक्षित गर्ने व्यवस्था गरेको हो। आदेशअनुसार, सरकारले गरेको बर्खास्ती निर्णय तत्काल लागू नहुने र नयाँ अध्यक्ष नियुक्तिको प्रक्रिया यथास्थितिमा रोकिएको छ।
सरकारले चार महिनामात्रै कार्यभार सम्हालेका ओझालाई कार्यसम्पादन कमजोर भएको भन्दै पदमुक्त गर्ने निर्णय गरेको थियो। तर, उक्त निर्णयविरुद्ध ओझाले गत आइतबार सर्वोच्च अदालतमा मुद्दा दायर गरेका थिए।
अदालतको आदेशसँगै ओझाले पदमा निरन्तरता पाउने भएका छन् भने बीमा प्राधिकरणमा नेतृत्वको अन्योलता फिलहाल टरेको छ।
