यूएईले नेपाली नागरिकको भिजिट भिसा अस्थायी रूपमा निलम्बित गर्यो
काठमाडाैं, ३१ भदाै । संयुक्त अरब इमिरेट्स (यूएई) ले नेपाली नागरिकको भिजिट भिसा अस्थायी रूपमा निलम्बित गरेको छ।
हालसम्म नेपाली दूतावासले औपचारिक सूचना भने प्राप्त नगरेको भए पनि यूएई निकायमार्फत अनौपचारिक रूपमा पुष्टि भएको जनाएको छ। यो निर्णय सोमबार (सेप्टेम्बर १५) देखि लागु भएको हो।
सूचना अनुसार, भिसा निलम्बनको कारण नेपालमा सेप्टेम्बर ९ मा भएका प्रदर्शनका क्रममा भएको तोडफोड, आगजनी र लुटपाट सम्बन्धी अनुसन्धानसँग जोडिएको छ। त्यसैगरी, हालै नेपालमा भएको जेल भगाउने घटना पनि यूएईले कडा कदम चाल्न प्रेरित भएको विश्वास गरिएको छ।
यूएई नेपाली भिजिट भिसामा जाने शीर्ष गन्तव्य हो। लामो समयदेखि दलालहरूले नेपाली महिलालाई कुवेत, ओमान र बहरीन जस्ता देशमा घरेलु कामको लागि पठाउन भिजिट भिसाको दुरुपयोग गर्दै आएका छन्, जसले यूएई अधिकारीहरूलाई यस विषयमा सतर्क बनाएको छ।
यो कदमले यूएई जाने नेपाली नागरिकको यात्रा र रोजगार योजना प्रभावित हुने देखिन्छ।
