चीनले नेपाललाई चार सामुद्रीक र तीन सुख्खा बन्दरगाह प्रयोग गर्न दिने

काठमाडौं, २२ भदौ । चीनले नेपाललाई तेश्रो मुलुकसँग व्यापारका लागि चार वटा सामुद्रीक बन्दरगाह र तीन वटा सुख्खा बन्दरगाह उपयोग गर्न दिने भएको छ । चीनसँग भएको पारवहन सम्झौता कार्यान्वयनका लागि प्रोटोकल तयार गर्न काठमाडौंमा बसेको दुई देशका अधिकारीहरुको संयुक्त बैठकले उक्त प्रोटोकललाई अन्तिम रुप दिएको छ । जसअनुसार, नेपालले चीनका तिन्जियान, सेन्जेन, लियानुआङ र झान्जियाङ सामुद्रीक बन्दरगाह उपयोग गर्न पाउने भएको हो ।
त्यसैगरी, नेपाललाई लान्झाओ, ल्हासा र सिगात्सेका तीन सुख्खा बन्दरगाह पनि प्रयो गर्न दिन चीन सरकार सहमत भएको छ । सिगात्सेसम्म नेपाली ट्रक, कन्टेनरले प्रवेशको अनुमति पाउने भएका छन् । नेपालले रेल र सडक दुवै मार्गबाट चीनको बाटो भएर तेश्रो देशबाट आयात र त्यसतर्फ निर्यात गर्न सक्नेछ ।
उद्योग, वाणिज्य तथा आपूर्ति मन्त्रालयका सहसचिव नवराज ढकालले नेपालले ६ ओटा नाका भएर चीनको बाटो हुँदै तेश्रो देशसँग व्यापार गर्न सक्ने उल्लेख गरे । जसअनुसार, सञ्चालनमा रहेका दुई रसुवा र तातोपानी छन् । यीबाहेक चीनसँग नाका खोल्ने सहमति भएका अन्य नाकाहरुमा मुस्ताङको कोराला, हुम्लाको यारी (हिल्सा), संखुवासभाको किमाथांका र ताप्लेजुङको ओलाङचुक गोला रहेका छन् ।
प्रोटोकलको अन्तिम मस्यौदामा उद्योग, वाणिज्य तथा आपूर्ति मन्त्रालयका सहसचिव रविशंकर सैंजू र चिनियाँ यातायात व्यवस्था विभागका महानिर्देशक वाङ सुइपिङले हस्ताक्षर गरेका छन् । नेपाल र चीनबीच उच्च नेतृत्वको भ्रमणका क्रममा प्रोटोकल आदानप्रदान भएपछि यो सम्झौता कार्यान्वयनमा आउने छ । दुई वर्षअघि प्रधानमन्त्री केपी शर्मा ओलीले आफ्नो अघिल्लो कार्यकालमा चीनसँग पारवहन सम्झौता गरेका थिए । चीनसँगको सम्झौता कार्यान्वयनमा आएपछि नेपालले भारत र चीन दुवैतर्फबाट पारवहन प्रयोग गरी तेश्रो देशसँग व्यापार गर्न सक्नेछ ।