नवलपरासी कारागारबाट भागेका मध्ये २२२ कैदी फर्किए

काठमाडाैं, ९ असाेज । राष्ट्रिय Gen-Z आन्दोलनको क्रममा ९ सेप्टेम्बरमा नवलपरासी कारागारबाट भागेका कैदी क्रमशः स्वेच्छाले फर्किन थालेका छन्। जेलर बिकल श्रेष्ठका अनुसार कुल ५४६ मध्ये २२२ जना कैदी हालसम्म कारागारमा पुनः उपस्थित भइसकेका छन्।

श्रेष्ठले बताएअनुसार कैदीहरूले त्यतिबेला सुरक्षाकर्मीलाई नियन्त्रणमा लिएर जेलको पर्खाल नाघी भागेका थिए। तर १७ पुरुष र १२ महिला कैदी भने भाग्न अस्वीकार गरी कारागारमै बसेका थिए।

पलायनपछि प्रशासनले कैदीहरूलाई स्वेच्छाले फर्कन सार्वजनिक सूचना जारी गरेको थियो, जसको फलस्वरूप दैनिक रूपमा कैदीहरू फर्किरहेका छन्।

जेलर श्रेष्ठका अनुसार भागेका मध्ये ४० जना भारतीय नागरिक थिए, जसमा हालसम्म एकजना फर्किएका छन्। साथै, नवलपरासी कारागारका १३ कैदीलाई देशका अन्य कारागारमा सारिएको छ भने अन्य ६ कैदीलाई यहाँ ल्याइएको छ।

यस्तै, केन्द्रीय कारागारबाट भागेका दुई जना मोरक्कोका र एक जना दक्षिण अफ्रिकी कैदी अहिले नवलपरासी कारागारमा रहेको जानकारी समेत उनले दिए।