धितोपत्र बोर्ड भन्छ लगानीकर्ता आतिनुपर्ने अवस्था छैन, होसियारपुर्वक लगानी गर्दा उत्तम
काठमाडौं, ७ चैत । पछिल्लो समय शेयर बजारको परिसुचक निरन्तर ओरालो लाग्दै गएको छ । यसरी नेप्से परिसुचक ओरालो लाग्दै गए पछि लगानीकर्ताहरुको लगानीे गुम्दै गएको छ । निरन्तर ओरालो लाग्दै गएपछि शेयर बजार प्रति लगानीकर्ताहरुको आकर्षण समेत घट्दै गएको पाइएको छ । जसलाई शेयर बजारको कारोबार रकमले समेत पुष्टी गरेको छ ।
शेयर बजारमा निरन्तर गिरावटको कारण लगानीकर्ताहरुको आतिनुपर्ने अवस्था नभएको नेपाल धितोपत्र बोर्डका प्रबक्ता निरज गिरीले बताएका छन् । ‘नेप्से ओरालो लाग्दैमा लगानीकर्ताहरु आतिनुपर्ने आवस्था छैन,’ उनले भने । ‘तर यो समयले होसियारीपुर्वक लगानी गर्न आवश्यक रहेको छ ।’ शेयर बजारको परिसुचक माथि उक्लेने र तल झर्ने प्रक्रिया सामान्य रहेको भन्दै उनले त्यसो भनेको प्रष्टाएका छन् । ‘शेयर बजारको प्रक्रिया नै माथि जाने र तल झर्ने हो,’ गिरीले बताए ।
मुलुकको समग्र आर्थिक अवस्थाको कारण नै शेयर बजारमा यसको प्रभाव पारेको धितोपत्र बोर्डका प्रवक्ता गिरीले जनाए । पुँजीगत खर्च बढ्न नसक्नु र नयाँ गठित सरकारले तय गर्ने निती प्रष्ट नभएको कारण शेयर बजारमा यसको प्रभाव परेको छ । यता वित्तीय प्रणालीमा निक्षेप अभाव हुन गई कर्जा प्रवाह गर्न बैंकहरुले रोक लगाइएको कारणले समेत शेयर बजार ओरालो लाग्न गएको छ । वित्तीय प्रणालीमा लगानी योग्य रकमको अभावको कारण निक्षेपको व्याजदरमा वृद्धि आएको छ । जसको प्रभावले कर्जाको व्याजदरलाई समेत बढाएको छ । यसरी कर्जाको व्याजदरमा आएको वृद्धिले नयाँ कर्जा प्रवाह हुन सकेको छैन । कर्जा प्रवाह हुन नसक्दा मुलुकको समग्र अर्थतन्त्रमा यसको असर पर्ने देखिएको छ । यस्तै कर्जा प्रवाहमा रोक लागेसंगै शेयर कर्जामा समेत सुस्तता आएको छ ।
धितोपत्र बोर्डका प्रवक्ता गिरीका अनुसार हाम्रो शेयर बजारमा दिर्घकालिन लगानीकर्ताहरुको अभावको कारणले पनि शेयर बजारमा छोटो समयमा नै प्रतिक्रिया जनाउने प्रवृति हावी रहेको छ । ‘छोटो अवधिको लागि लगानी गर्ने लगानीकर्ताहरु छन्, त्यसैले बजारले छोटो अवधिमा नै यस्तो खालको प्रतिक्रिया दिन्छ,’ उनले भने । छोटो अवधिका लागि लगानी गर्ने र त्यसको प्रतिफल सुरक्षित गर्ने लगानीकर्ताहरु भएका कारण बजार यतिको प्रतिक्रियात्मक भएको उनको भनाइ रहेको छ । दिर्घकालिन लगानीकर्ताहरु शेयर बजारमा प्रवेश गर्न आवश्यक रहेको उनले बताए ।
यस्तै शेयर बजार घट्दो क्रममा रहेको समय शेयर किन्ने उत्तम समय भएको गिरीले बताए । यसरी शेयर बजार घटिरहँदा राम्रै कम्पनीहरुको शेयर सस्तोमा पाउने उनले बताएका छन् । शेयर बजारमा शेयर खरिद गर्ने र बिक्री गर्ने दुई पात्रहरु हुने गर्दछन् । शेयर लगानीकर्ता वारेन बफेटले समेत अरु डराएका बेला आफुले शेयर किन्ने र अरु लोभी भएका बेला आफुले शेयर बेच्ने भनेका छन् । शेयर बजारमा गिरावट आउँदा शेयर मुल्यमा समेत कमी आउने हुन्छ । यहि मौकाको सदुपयोग गर्दा लगानीकर्ताहरुलाई फाइदा हुने गर्दछ । तर शेयर खरिद गर्न खोजिएको कम्पनीको विश्लेषण भने आवश्यक पर्दछ ।
बुधबार शेयर बजार दोहोरो अंकले घटेको छ । नेप्से परिसुचक आज २४.४ अंकले घटेर १२३१.०७ विन्दुमा पुगेको छ । शेयर बजार बुधबार १.९४ प्रतिशतले घटेको छ । आज कुल १५२ कम्पनीहरुको ९ लाख ४५ हजार ५३७ कित्ता शेयरको किनबेचबाट ३८ करोड ३२ लाख १५ हजार ४२४ रुपैयाँको कारोबार भएको छ । बुधबार कारोबार भएका १० कम्पनीहरुका लगानीकर्ताहरुले कमाएका छन् भने १३४ कम्पनीहरुको लगानीकर्ताहरुले गुमाएका छन् ।
