चिनी आयातमा परिमाणात्मक बन्देजको लाभ उठाउँदै व्यापारीले मनपरी मूल्य बढाए
काठमाडौं, १६ असोज । सरकारले चिनी आयातमा लगाएको परिमाणात्मक बन्देजको फाइदा उठाउँदै व्यापारीहरुले प्रतिकिलो चिनीमा १५ रुपैँया सम्म मूल्य बढाएर ८० रुपैँया प्रतिकेजी पुर्याएका छन् ।
दुई साताअघि सरकारले चिनी आयातमा परिमाणात्मक बन्देज लगाउनुअघि बजारमा ६५ रुपैँया प्रतिकिलो चिनी उपलब्ध हुन्थ्यो । सरकारी सहुलियतमा उत्पादित चिनीले विश्व बजारमा चिनीको मूल्य गिराएकाले स्वदेशी उद्योगहरुले चिनी बिक्री गर्न नसकेको भन्दै सरकारले आयातमा परिमाणात्मक बन्देज लगाउनुअघि चिनीको भन्सार दोब्बर वृद्धि गरी ३० प्रतिशत पुर्याएको थियो । त्यति गर्दा पनि आयातीत चिनीका कारण स्वदेशी उद्योगीले चिनी बिक्री गर्न नसकेको भन्दै सरकारले सबैभन्दा बढी चिनी खपत् हुने ठूला चाडहरु दशैं, तिहार र छठको मुखमा चिनी आयातमा परिमाणात्मक बन्देज (क्वान्टिटेटीभ रेस्ट्रिक्सन) लगाइदियो ।
सरकारले यो वर्षका लागि एक लाख टनसम्म चिनी आयात गर्न अनुमति दिएको छ । यस आर्थिक वर्षमा सो परिमाणको हाराहारीमा चिनी आयात भैसकेको आयातकर्ताहरु बताउँछन् । दशैं, तिहार र छठलाई लक्षित गर्दै खोलिएका सुपथ मूल्य पसलमा समेत चिनीको मूल्य ७० रुपैँया केजी तोकिएको छ । सरकारले परिमाणात्मक बन्देज लगाएपछि आयातकर्ताहरुले समेत चिनीको मूल्य बढाएका छन् । सरकारले आपूर्ति घटाइदिएको मौका छोपेर उनीहरुले बढी माग हुने समयमा चिनीको कृत्रिम मूल्यवृद्धि गरेर उपभोक्तालाई मारमा पारेपनि यसबारेमा सरकार मौन देखिएको छ ।
