प्रधानमन्त्री रोजगार कार्यक्रमका लागि विश्व बैकले दियो करिब १४ अर्ब ऋण

काठमाडौं १ असोज । प्रधानमन्त्री रोजगार कार्यक्रमका लागि विश्व बैंक अन्तर्गतको अन्तरराष्ट्रिय विकास संस्था (आईडीए) ले १३ अर्ब ६५ करोड (१२० मिलियन डलर) सहुलियत ऋण स्वीकृत गरेको छ । विश्व बैंकले ‘युथ इम्प्लोयमेन्ट ट्रान्सफर्मेशन इनिसिएटिभ प्रोजेक्ट’ का नाममा उक्त ऋण स्वीकृत गरेको अर्थमन्त्रालयले बताएको छ । उक्त ‘प्रोजेक्ट’ श्रम, रोजगार तथा सामाजिक सुरक्षा मन्त्रालय अन्तर्गत रहने बताइएको छ ।

यसका साथै सरकारले कार्यक्रमका लागि चालू आर्थिक वर्ष २०७६÷७७ मा ५ अर्ब १ करोड रुपैयाँ बजेट विनियोजन गरिसकेको छ । गत आवमा सरकारले यस कार्यक्रम अन्तर्गत १ लाख ८८ हजारलाई १३ दिनको काम दिएको र ७ हजार ४०० साना–ठूला परियोजना सञ्चालन भएको थियो । सरकारले बेरोजगारलाई वर्षमा कम्तीमा सय दिन काम दिने र काम दिन नसके वार्षिक २५ हजार ८५० रुपैयाँ भत्ता दिने गरी प्रधानमन्त्री रोजगार कार्यक्रम घोषणा गरेको थियो । गतवर्ष यस कार्यक्रमका लागि २ अर्बभन्दा बढी बजेट स्थानीय तहलाई अनुदानका रूपमा उपलब्ध गराइएको थियो ।