श्रम स्विकृती लिएर विदेश जाने ९६ प्रतिशतले घट्दा रेमिट्यान्स आय भने १२ प्रतिशतले बढ्यो

काठमाडौं, १० मंसिर । चालू आर्थिक वर्ष २०७७÷७८ को तीन महिनामा नेपालको विप्रेषण आप्रवाह (रेमिट्यान्स आय) १२.६ प्रतिशतले बढेको छ । नेपाल राष्ट्र बैंकले आज सार्वजनिक गरेको तथ्यांक अनुसार सोही अवधीमा २ खर्ब ५८ अर्ब ८६ करोड रुपैयाँ विप्रेषण भित्रिएको छ ।

अघिल्लो वर्षको सोही अवधिमा विप्रेषण आप्रवाह ५.१ प्रतिशतले घटेको थियो । अमेरिकी डलरमा विप्रेषण आप्रवाह ७.६ प्रतिशतले बृद्धि भई २ अर्ब १८ करोड रुपैयाँ पुगेको छ । अघिल्लो वर्ष यस्तो आप्रवाह ४.७ प्रतिशतले घटेको थियो ।

कोरोनाले विश्वव्यापीरुपमै आर्थिक मन्दी सृजना गरेकाले चालू वर्षमा विप्रेषणआप्रवाह घट्ने अनुमान गरिएको छ । विश्व बैंकले पनि यो वर्ष विश्वभर रेमिट्यान्सको प्रवाहमा २० प्रतिशत कमी आउँदा नेपाल भित्रिने रेमिट्यान्स भने १४ प्रतिशत घट्न सक्ने आकलन गरेको छ ।

अन्तिम श्रम स्वीकृति लिने भने घटे

समीक्षा अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) लिने नेपालीको संख्या ९६.८ प्रतिशतले घटेको छ । अघिल्लो वर्षको सोही अवधिमा यस्तो संख्या ३.७ प्रतिशतले घटेको थियो । वैदेशिक रोजगारीका लागि पुनः श्रम स्वीकृति लिने नेपालीको संख्या समीक्षा अवधिमा ७८.६ प्रतिशतले घटेको छ । अघिल्लो वर्षको सोही अवधिमा यस्तो संख्या ०.९ प्रतिशतले घटेको थियो ।