मध्य भोटेकोशीले आयोजना प्रभावितलाई वैशाख २१ गतेदेखि आइपीओ जारी गर्ने
काठमाडौं, १३ वैशाख । मध्य भोटेकोशी जलविद्युत् कम्पनीले यही वैशाख २१ गतेदेखि आयोजना प्रभावित स्थानीयका लागि आईपीओ जारी गर्ने भएको छ । कम्पनीले १ करोड ५० लाख कित्ता शेयरमध्ये आयोजना प्रभावित स्थानीयका लागि कुल ६० लाख कित्ता आइपीओ जारी गर्न लागेको हो ।
कुल कित्ता मध्ये सिन्धुपाल्चोक जिल्लाको भोटेकोशी गाउँपालिका वडा नं। (साविक लिस्ती गाविसं र मार्मिङ गाविस) १ र ५ , बाहृविसे नगरपालिका वडा नं. ५ र ६ (साविक गाती गाविस) तथा बाहृविसे नगरपालिका वडा नं. ७ र ८ (साविक घुमथाङ गाविस र मानेश्वरा गाविस)का वासिन्दाका लागि ३० प्रतिशतको दरको १८ लाख कित्ता र उल्लेखित स्थानिय बाहेक सिन्धुपाल्चोक जिल्लाका अन्य स्थानियका लागि ७० प्रतिशतको दरले ४२ लाख कित्ता आइपीओ जारी गर्न लागेको हो ।
स्थानीयले छिटोमा जेठ ४ गते र ढिलोमा जेठ २० गतेसम्म आईपीओ भर्न सक्ने छन् । आवेदनमा न्यूनतम १० कित्तादेखि अधिकतम ४०० कित्तासम्म माग गर्न सक्ने जनाइएको छ । कम्पनीको विक्री प्रबन्धक ग्लोबल आईएमई क्यापिटल लिमिटेड रहेको छ ।
चिलिमे जलविद्युत् कम्पनीको सहायक मध्य भोटेकोशीको निर्माणाधीन यो आयोजनाको कुल विद्युत उत्पादन क्षमता १०२ मेगावाट हो ।
