पहिलो आर्थिक टेलिभिजन कार्यक्रम ‘अर्थको अर्थ’ ले मनायो रजत जयन्ती
काठमाडौं, १३ बैशाख । हरेक आइतबार बेलुँकी ९ ः ३० बजे नेपाल टेलिभिजनबाट प्रशारण हुने आर्थिक कार्यक्रम अर्थको अर्थले रजत जयन्ती मनाएको छ । रजत जयन्ती समारोहको अर्थ मन्त्री डाक्टर युवराज खतिवडाले उद्घाटन गरे । सो अवसरमा अर्थको अर्थको उत्पादन संस्था आइबिएन मिडिया एन्ड रिसर्चले आगामी दिनमा मुलुकको आर्थिक मुद्धालाई अझ सशक्त ढंगले उठान गर्ने प्रतिवद्धता जनाइएको छ ।
रजत जयन्तीकै अवसरमा संघीयतामा बजेट व्यवस्थापन विषयक अन्तरक्रिया कार्यक्रम पनि आयोजना गरिएको थियो । सो छलफलमा अर्थमन्त्री डा.खतिवडाले सरकारले सरोकारवाला निकायहरुसँग गरि संघीय बजेट निर्माण गर्ने बताए । निर्वाचन पश्चात संघीयता कार्यान्वयन भएपनि आगामी बजेट मार्फत मात्रै वित्तिय संघीयता कार्यान्वयन हुने बताए ।
त्यस्तै कार्यक्रममा नेपाल उद्योग परिसंघका अध्यक्ष हरिभक्त शर्मा र नेपाल उद्योग बाणिज्य महासंघका बरिष्ठ उपाध्यक्ष शेरख गोल्छाले सरकारले मुलुकमा लगानीमैत्री वातावरण सृजना गनुपर्नेमा जोड दिए । अहिले पैसा भएर पनि असुरक्षाका कारण लगानी हुन नसकेको भन्दै उनीहरुले सरकारको ध्यानकार्षण गराए ।
सो अवसरमा वित्तिय संघीयता बिज्ञ डा.खिमलाल देवकोटाले संघीयतामा बजेट व्यवस्थापन विषयमा कार्यपत्र प्रस्तुत गरेका थिए भने पूर्व गभर्नर दिपेन्द्रबहादुर क्षेत्रीले टिप्पणी गनरेका थिए ।
