एक वर्षमा १४ अर्ब २५ करोड रुपैयाँले बढ्यो बीमाशुल्क संकलन
काठमाडौं, २१ वैशाख । चालू आर्थिक वर्षको तेस्रो त्रैमाससम्मा नेपालका बीमा कम्पनीहरूको कुल बीमाशुल्क संकलन १ खर्ब ३१ अर्ब १३ करोड रुपैयाँभन्दा बढी पुगेको छ । गत आर्थिक वर्षको सोही अवधिमा कम्पनीहरूको कुल बीमाशुल्क संकलन १ खर्ब १६ अर्ब ८८ करोड रुपैयाँ थियो ।
बीमा समितिका अनुसार एक वर्ष अवधिमा बीमा कम्पनीहरूको बीमाशुल्क संकलन १४ अर्ब २५ करोड रुपैयाँले बढेको छ, गतवर्षको तुलनामा १२.१९ प्रतिशत बढी हो ।
सो अवधिमा जीवन बीमा कम्पनीको बीमाशुल्क संकलन १ खर्ब २ अर्ब ४२ करोड रुपैयाँ रहेको छ, जुन गत आवको सोही अवधिको तुलनामा ९.१३ प्रतिशतले बढी हो । यस्तै निर्जीवन बीमा कम्पनीको कुल बीमा शुल्क संकलन २८ अर्ब ७० करोड रुपैयाँ पुगेको छ । यो गतवर्षको सोही अवधिको भन्दा २४.२८ प्रतिशतले धेरै हो ।
