जुलाईमा साढे ६४ हजार पर्यटक नेपाल भित्रिए, बढ्याे अमेरिकी पर्यटककाे संख्या
काठमाडाैं, १८ साउन । अंग्रेजी वर्ष सन् २०२४ को जुलाई महिनामा साढे ६४ हजार विदेशी पर्यटक नेपाल भित्रिएका छन्। नेपाल पर्यटन बोर्डकाे तथ्यांक अनुसार जुलाईमा ६४ हजार ५९९ पर्यटक नेपाल आएका हुन्।
जुलाईमा पनि सबैभन्दा बढी भारतबाट आएका छन् । यस एक महिनामा भारतबाट २१ हजार ४९१ भारतीय पर्यटक भित्रिएका छन्। यस्तै धेरै पर्यटक नेपाल भित्रिनेमा चीनलाई उछिन्दै दाेस्राेमा अमेरीका बनेकाे छ । यस अवधिमा अमेरिकाबाट ७ हजार ८४६ पर्यटक नेपाल भित्रिएका छन् ।
यस्तै यस अवधिमा चीनबाट ६ हजार ८१९, बेलायबाट ३ हजार ८०६, बंगलादेशबाट ३ हजार ४७०, अष्ट्रेलियाबाट एक हजार ९०१ र साउथ कोरियाबाट एक हजार ५३७ पर्यटक भित्रिएका छन्।
