हस्तकला विकासमा सरकारले सहयोग गर्ने अर्थमन्त्री खतिवडाको प्रतिवद्धता
काठमाडौं, २८ कात्तिक ।१६ औं हस्तकला व्यापार मेला तथा १४ औं हस्तकला प्रतियोगिता बुधबारबाट काठमाडौंमा सुरु भएको छ । मेलाको उद्घाटन गर्दै अर्थमन्त्री डाक्टर युवराज खतिवडाले नेपालको हस्तकला क्षेत्रको विकासका लागि आवश्यक सहयोग गर्न सरकार प्रतिवद्ध रहेको बताउनुएको छ । साथै अर्थमन्त्री खतिवडाले सबै स्थानियतहमा हस्तकला पशिक्षण केन्द्र खोल्न ७ वटै प्रदेश सरकारहरुलाई आग्रह गर्नु भयो । उद्घाटन समारोहमा मन्त्री खतिवडाले परम्परागत हस्तकलालाई भावी पुस्तामा हस्तान्तरण गर्नेको लागी सबै स्थानिय तहमा हस्तकला तालिम केन्द्रको स्थापना गर्न प्रदेश सरकारलाई आव्हान गर्नु भएको हो ।
कार्यक्रममा नेपाल उद्योग वाणिज्य महासंघकी अध्यक्ष भवानी राणाले विश्वमा नेपालको परिचय दिलाउन सफल हस्तकला क्षेत्रको विकासका लागि आवश्यक सहयोग गर्न आफू तयार रहेको बताउनु भएको थियो । नेपालको अर्थतन्त्रलाई चलायमान बनाउन पनि हस्तकला क्षेत्रले उल्लेख्य योगदान दिएको उहाँको भनाई थियो ।
५ दिनसम्म चल्ने मेलामा करिव १ सय ७० वटा स्टल रहेका छन । मेलामा भारत, चीन, पाकिस्तान, श्रीलंका, बंगलादेश, भुटानसहितका अन्तराष्ट्रिय व्यापारीहरुको करिव २० वटा स्टल पनि रहेको मेला आयोजक समितिका संयोजक हेमरत्न शाक्यले जानकारी दिनु भयो ।
