एनबिआई र मुक्तिनाथ विकास बैंकबीच वित्तीय साक्षरता सम्बन्धी सम्झौता
काठमाडौं, २६ चैत । नेशनल बैंकिग ईन्स्टिच्यूट (एनबिआई) र मुक्तिनाथ विकास बैंकबीच वित्तीय साक्षरता सम्बन्धी सम्झौता भएको छ । उक्त सम्झौतामा एनबिआईको तर्फबाट सहायक महाप्रबन्धक धन थापा र मुक्तिनाथ विकास बैंकको तर्फबाट प्रमुख कार्यकारी अधिकारी प्रद्युमन पोखरेलले हस्ताक्षर गरेको हुन् ।
सो अनुरुप एनबिआईले बनाएको वित्तीय साक्षरता सम्बन्धी मोबाईल एप्सको संरचना र सुविधाहरुबारे मुक्तिनाथ विकास बैंकका कर्मचारीहरुलाई विस्तृत जानकारी गराईने छ । बैंकले आफ्ना सञ्जालमा रहेका सबै शाखाका कर्मचारीहरुलाई एनबिआई मोबाइल एप्सबारे ज्ञान दिलाई आ – आफ्नो ग्राहकमाझ वित्तीय साक्षरता कार्यक्रमलाई सहजताका साथ विस्तार गर्नको लागिको प्रेरित गर्नेछ ।
साथै बैंकले एनबिआई एप्स मार्फत समाजका विभिन्न वर्गहरु जस्तै महिला समुह, किसान, रेमिट्यान्समा आश्रित परिवारहरु, शिक्षक शिक्षिकाहरु तथा विद्याथीहरुलाई वित्तीय साक्षरताबारे जानकारी गराउनेछ । वित्तीय साक्षरताको आवश्यक सामाग्री माझ लैजान एनबिआई मोबाईल एप्सको प्रयोगले देशमा वित्तीय साक्षरताको विस्तारमा नयाँ आयामको सुरुवात विश्वास राखिएको छ ।
