धनगढी विमानस्थल स्तरोन्नतीको काम ३० प्रतिशत मात्रै सम्पन्न, जेठ २१ देखि विमानस्थल संचालनमा आउन मुश्किल
विवेक नागरी
कैलाली, १२ जेठ । धनगढी विमानस्थल स्तरोन्नतीको काम ३० प्रतिशत मात्र सम्पन्न भएको छ । एक महिना भित्र सक्ने लक्ष्य सहित वैशाख २२ गतेदेखि विमानस्थल बन्द गरेर स्तरोन्नतीको काम सुरु गरिएको थियो ।
यही जेठ २१ गतेदेखि उडान सुचारु गर्ने गरि निर्माणको काम गर्ने प्रयास भइरहेको भएपनि अहिले सम्म ३० प्रतिशत मात्रै काम सकिएपछि समय अझ थप हुने अनुमान गरिएको छ । तर नेपाल नागरिक उड्डयन प्राधिकरणका पूर्व इञ्जिनीयर योगेन्द्रराज शर्माले तोकिएकै समयमा निर्माण कार्य सकिने र नियमित उडान हुने दाबी गर्छन ।
प्रायः १० वर्षमा धावन मार्गको स्तरोन्नति गर्नुपर्ने भए पनि धनगढी विमानस्थलको भने विगत १४ वर्षदेखि धावनमार्गको स्तरोन्नती गरिएको थिएन । स्तरोन्नतीको लागि लुम्बिनी, कोशी एन्ड न्यौपाने, खड्का, कोइराला जेभी काठमाडौले १७ करोड ८८ लाख रुपैयाँमा ठेक्का लिएका छन् । ६० मिटर चौडाइ र १८ सय मिटर लम्बाइ रहेको विमानस्थलको धावनमार्गमा थप कालोपत्रे, दुबैतर्फ २ र २ मिटर धावन मार्ग फराकिलो र पार्किङ्गको क्षमता समेत थप गरिने छ।
विमानस्थल जस्तो संवेदनशिल क्षेत्र बन्द गरेर निर्माण गर्नु नहुने भन्दै स्थानीयले सुरु देखि नै विकल्पको माग गरिरहेका थिए । अझ यहि गतिमा काम भए जेठ २१ बाट पनि विमानस्थल संचालनको छाटकाट नदेखिएको भन्दै स्थानीयले प्रदेश सरकारको ध्यनाकर्षण गराएका छन् ।
