सुदूरपश्चिम प्रदेशको भौतिक पूर्वाधार विकास मन्त्रालयको बजेट खर्च सात अर्व ७१ करोड

धनगढी, १६ साउन । सुदूरपश्चिम प्रदेशको भौतिक पूर्वाधार विकास मन्त्रालयले गत आर्थिक वर्ष २०७५÷०७६ मा भएको वार्षिक प्रगति विवरण सार्वजनिक गरेको छ । विवरण अनुसार गत आर्थिक वर्ष भौतिक पूर्वाधार मन्त्रालयलाई १० अर्ब चार करोड रुपैयाँ बजेट प्राप्त भएकोमा सात अर्ब ७१ करोड रुपैयाँ खर्च गरेको मन्त्रालयले जनाएको छ ।

मन्त्रालयले ७६.७८ प्रतिशत वित्तीय प्रगति हाँसिल गरेको सचिव इन्द्रदेव भट्टले बताए । उनका अनुसार सुरुमा प्राप्त बजेटमध्ये एक अर्ब ७१ करोड रुपैयाँ बजेट केन्द्रमै फिर्ता गएको थियो । खुटिया दिपायल सडक, नयाँ शहर योजना लगायतका केही आयोजनालाई सङ्घीय सरकारले केन्द्रमै तानेपछि त्यसका लागि मन्त्रालयलाई प्राप्त भएको बजेट पनि फिर्ता गएको सचिव भट्टले बताए ।
गत आर्थिक वर्षमा उक्त मन्त्रालयले उर्जा र जलविद्युतको सम्भाव्यता अध्ययन गरेको छ । सुर्नया, ठूलीगाड, नौगाड र दह खोला गरी चार वटा विद्युत आयोजनाको सम्भाव्यता अध्ययन भएको र त्यसमा १० देखि २० मेगावाटसम्म विद्युत उत्पादन गर्न सकिने सम्भावना देखिएको मन्त्रालयले जानकारी दिएको छ । यसैगरी, महाकाली, सेती र कर्णाली नदीमा जलयातायातको सम्भाव्यता अध्ययन, प्रदेश लोकमार्ग विधेयक स्वीकृत, मन्त्रालयका लागि गाडी खरिद र मन्त्रालयको पूर्वाधार मर्मत कार्यलाई पनि भौतिक पूर्वाधार विकास मन्त्रालयले गत आर्थिक वर्षको उपलब्धिको रुपमा लिएको छ ।

गत आर्थिक वर्षमा प्रदेश बस सेवा सञ्चालनका लागि २३ करोड रुपैया बजेट रहे पनि बस खरिद गर्न नसकेको मन्त्रालयले जानकारी दिएको छ । यद्यपि, प्रदेश बसको मोडेलको अध्ययन भएको जनाइएको छ । यसैगरी, ३४८ किलोमिटर सडकको अध्ययन र डीपीआर गरेकोे छ ।
भौतिक पूर्वाधार विकास मन्त्रालय मातहतमा २८ वटा कार्यालयहरु रहेका छन् ।