कृषि ऋण माग भएको हप्ता दिन भित्र उपलब्ध गराउन राष्ट्र बैंकको निर्देशन

काठमाडौं,२१ साउन । नेपाल राष्ट्र बैकले कृषि क्षेत्रका लागि ऋण प्रवाह गर्न बाणिज्य बैंक लगायतका वित्तीय संस्थालाई निर्देशन जारी गरेको छ । राष्ट्र बैंकले एक सूचना निकालेर १५ लाख रुपैयाँसम्मको कृषि ऋण माग भएको ७ दिनभित्रै उपलब्ध गराउन क, ख र ग वर्गका बैंक तथा वित्तीय संस्थालाई निर्देशन दिएको हो । यसै गरी कर्जा दिनु पहिले कुनै पनि प्रकारको शुल्क नलिन राष्ट्र बैंकले आग्रह गरेको छ । तोकिएको समय भित्र ऋण दिन नमिल्ने भएमा के कारणले दिन नसकिएको हो ग्राहकलाई जानकारी दिन पनि बैंकले निर्देशन दिएको छ । यस्तै कृषि ऋण दिँदा मोटरबाटो नपुगेको क्षेत्रको घरजग्गालाई पनि धितोको रुपमा स्वीकार गर्नुपर्ने र त्यसैगरी राष्ट्र बैंकले लघुवित्त वित्तीय संस्थालाई कृषिमा कूल कर्जाको एकतिहाइै कर्जा लगानी गर्नैपर्ने निर्देशन जारी गरेको छ । कूल कर्जाको एक तिहाई कर्जा कृषि क्षेत्रमा लगानी गर्नुपर्ने र त्यसो नभएमा नपुग रकममा २०७७ सालको असार मसान्तदेखि लघुवित्त संस्थाले गणना अवधिमा कर्जामा लिने अधिकतम ब्याजदरले हुने रकम हर्जना तिराइने राष्ट्र बैंकले जनाएको छ । गत साउन ८ गते सार्वजनिक चालु आर्थिक बर्षको मौद्रिक नीतिले नै लघुवित्त संस्थाले एक तिहाइ कर्जा कृषिमा लगानी गर्नुपर्ने व्यवस्था गरेको छ ।