मिलेनियम च्यालेञ्ज कम्प्याक्टको कार्यान्वयन आगामी वर्षको असार १६ देखि
काठमाडौं, २३ साउन । मिलेनियम च्यालेञ्ज कम्प्याक्टको कार्यान्वयन आगामी वर्षको असार १६ गतेबाट हुने भएको छ । नेपाल सरकार र अमेरिकी सरकारको प्रतिनिधिका रुपमा मिलेनियम च्यालेञ्ज कर्पोरेशनबीच विं सं. २०७४ को भद्रौमा कम्प्याक्ट सम्झौता भएको थियो ।
यस कार्यक्रम अन्तर्गत चार सय केभी क्षमताको १ सय १८ किलोमिटर प्रशारण लाइन एवं तीन वटा उच्च क्षमताको सब–स्टेशन निर्माण र बढीमा तीन सय किलोमिटरको रणनैतिक सडक मर्मतसम्भार गरिने छ । त्यसका लागि मिलेनियम च्यालेञ्ज कर्पोरेशनले ५० करोड अमेरिकी डलर र नेपाल सरकारले १३ करोड अमेरिकी डलर उपलब्ध गराउने सम्झौता भएको छ।
प्रयाप्त र भरपर्दो विद्युत आपूर्तिको अभाव र अप्रयाप्त सडक मर्मतसम्भारका कारणले हुन गएको उच्च यातायात लागतले मुलुकको आर्थिक बृद्धिमा समेत गम्भिर अवरोध सृजना गरेको निश्कर्ष सहित आयोजनाहरु तर्जुमा गरिएको जनाइएको छ । यो काम पाँच वर्ष भित्रमा सम्पन्न गरिसक्नुपर्ने छ । आयोजनाको समयावधी थप हुने छैन । काम सुरु गर्नका लागि विस्तृत डिजाइन, प्रशारण लाइन मार्ग निर्धारण, ठेक्का लागि टेण्डर आह्वानल लगायतको प्रक्रिया अघि बढिसकेको मिलेनियम च्यालेञ्ज एकाउण्ट नेपालका कार्यकारी निर्देशक खड्ग बहादुर विष्टले जानकारी दिए ।
