विपिसिले चिनियाँ कम्पनीलाई तल्लो मनाङ मर्स्याङ्दी ८० प्रतिशत सेयर विक्री गर्दै
काठमाडौं, ३ पुस । बुटबल पावर कम्पनीले १४० मेगावाट क्षमताको तल्लो मनाङ मर्स्याङ्दी जलविद्युत आयोजनाको ८०.६ प्रतिशत सेयर एससीआईजी इन्टरनेसनल नेपाल हाइड्रो ज्वाइन्ट डेभलपमेन्ट कम्पनीलाई विक्री गर्ने भएको छ । कम्पनीको पुस २४ गते हुन गै रहेको २७ औं वार्षिक साधारणसभामा स्वामित्व बिक्रीका लागि बीपीसीले विशेष प्रस्ताव लैजाने भएको छ ।
एससीआईजीमा बीपीसीको १९.४ प्रतिशत बाँकी एससीआईजी इन्टरनेसनल, जीचेङ इन्टरनेसनल इन्भेस्टमेन्ट कम्पनी, क्युआईइसी इन्टरनेसनल कम्पनी हङकङको लगानी रहने छ । मनाङमा पर्ने १४० मेगावाटको सो आयोजनाबाट ६९ करोड ८२ लाख युनिट बिजुली उत्पादन हुने संभाव्यता अध्ययनले देखाएको छ । तल्लो मनाङ मस्र्याङदी आयोजना भन्दा तल दुई आयोजनासंग क्यासकेड अवधारणामा स्रोतको अधिकतम उपयोग हुने गरी बिजुली उत्पादन बढाउने लक्ष्य रहेको बीपीसीले जनाएको छ । आयोजनाको संरचना मनाङको नासोङ गाउँपालिकाम रहनेछ । आयोजनाबाट उत्पादन हुने बिजुली नासोङ गाउँपालिकाको घेलाञ्चोक र ओडार गाउँमा प्रस्तावित २२० केभी मनाङ हवमा ल्याएर जोडिने छ ।
बीपीसीले नेपालमा १ हजार मेगावाट बिजुली उत्पादन गर्न चीनबाट २ खर्ब रुपैयाँ बढी वैदेशिक लगानी ल्याउन चिनियाँसँग सम्झौता गरेको छ । होल्डिङ कम्पनीमार्फत आउदो ५ वर्षमा थप १ हजार मेगावाट बिजुली उत्पादन गर्ने लक्ष्य लिइएको छ । बीपीसीले ३० मेगावाटको न्यादी आयोजनाको निर्माण गरिरहेको छ ।
