नेप्से परिसूचकले १३०० को विन्दु पार गर्याे, कारोबारमा पनि उलेख्य वृद्धि

काठमाडौं, २ माघ । नेप्से परिसूचकले लामोे समयपछि १३०० को विन्दु पार गरेको छ । केही सातादेखि लगातार वृद्धि हुन थालेको नेप्से परिसूचक साताको अन्तिम कारोबार दिन बिहीबार (आज) पनि वृद्धि भएर बन्द भएको हो । हिजो २०.८५ अंकले वृद्धि भएको नेप्से परिसूचक आज २६ अंकले वृद्धि भई १३१०.२३ विन्दुमा रोकिएको छ । बजार यो विन्दु ९ महिना अघि वैशाख १६ गते पुगेको थियो ।

त्यस्तै आज सेयर कारोबार रकम पनि ८० करोड रुपैयाँ वृद्धि भएको छ । हिजो ९० करोड ४८ लाख रुपैयाँको कारोबार भएकोमा आज १ अर्व ६९ करोड ९९ लाख रुपैयाँको कारोबार भएको छ । १८१ कम्पनीको ५० लाख २५ हजार ५६३ कित्ता सेयर खरिद विक्री भएको छ ।

बढी कारोबार हिमालयन डिस्टिलरी र शिवम् सिमेन्टको
कारोबारमा आएका कम्पनीहरुमध्ये सबैभन्दा बढी सेयर कारोबार हिमालयन डिस्टिलरी लिमिटेड र शिवम् सिमेन्टको भएको छ । हिमालयन डिस्टिलरीको १४ करोड ३८ लाख रुपैयाँको सेयर कारोबार भएको छ भने शिवम् सिमेन्टको १३ करोड ५९ लाख रुपैयाँको सेयर कारोबार भएको हो । हिमालयन डिस्टिलरीको बजार बन्द हुँदा प्रतिकित्ता सेयर मूल्य १२६८ रहेको छ । त्यस्तै एन आई सी एशिया बैंकको ६ करोड ८३ लाख रुपैयाँको सेयर कारोबार भएको छ भने प्रभु बैंक, नेपाल लाईफ इन्स्योरेन्स कम्पनी, नेपाल बैंक र कुमारी बैंकको ४ करोड रुपैयाँभन्दा बढीको सेयर कारोबार भएको छ ।

कारोबारमा आएका १२ समूहमध्ये अन्य समूहको परिसूचकमा गिरावट आएको छ । उक्त समूहको ०.२५ प्रतिशतले परिसूचकमा गिरावट आएको हो । त्यस्तै आज सबैभन्दा बढी परिसूचक वृद्धि हुनेमा फाईनान्स समूह रहेको छ । उक्त समूहको ४.१६ प्रतिशतले परिसूचकमा वृद्धि भएको हो ।

 

 

Leave a Reply

Your email address will not be published. Required fields are marked *